نواسےکی شادی پر کروڑوں خرچ کرنے والے مہنگائی کا رونا رو رہے ہیں، فواد چوہدری

وفاقی وزیر اطلاعات و نشریات فواد چوہدری نے مزارِ قائد پر قائد حزبِ اختلاف شہباز شریف کی پریس کانفرنس پر ردعمل دیتے ہوئے کہا کہ شہبازشریف نے مزار قائد پر مضحکہ خیز پریس کانفرنس کی۔

 فواد چوہدری نے شہباز شریف کو مشورہ دیا کہ لاکھوں لوگوں کا اسلام آباد میں اجتماع کرنے کے بجائے اپنے بھائی کو لندن سے بلائیں، شہباز شریف کے بھائی پاکستان میں اپنے خلاف مقدمات کا سامنا کریں۔

فواد چوہدری نے کہا کہ ایک طرف نواسے کی شادی پر کروڑوں خرچ، دوسری طرف عوام کیلئے مہنگائی کا رونا۔

مسلم لیگ نون کے صدر اور قومی اسمبلی میں اپوزیشن لیڈر شہباز شریف کا کہنا ہے کہ کراچی میں پبلک ٹرانسپورٹ اور پانی پر اربوں روپے خرچ کرنے چاہییں، اگر موقع ملا تو کراچی کو پیرس بنا دیں گے۔

انہوں نے کہا کہ شہباز شریف سیاست چھوڑیں اور اپنے وکیلوں کے ساتھ مشورہ کریں، مضبوط کیسزکی بدولت لگتا نہیں کہ شہباز شریف زیادہ دیر جلسوں سےخطاب کرسکیں گے۔

وفاقی وزیر نے کہا کہ پوری دنیا کی توجہ افغانستان پر ہے لیکن مسلم لیگ ن نے اس بارے میں ایک لفظ نہیں کہا، ن لیگ کی لیڈر شپ عالمی طاقتوں کی حمایت جیسےحاصل کرناچاہتی ہے وہ باعث شرم ہے۔

ترجمان مسلم لیگ نون مریم اورنگزیب نے وفاقی وزیر برائے سائنس و ٹیکنالوجی فواد چوہدری کے بیان پر ردعمل دیتے ہوئے نئی حکمت عملی کے تحت نئی نوکری ڈھونڈنے کا مشورہ دے دیا۔

انہوں نے کہا کہ مسلم لیگ ن میں پارٹی کی صدارت کیلئے ٹاس ہوتا ہے، اس بار شہباز شریف صدر ہیں اگلی باری مریم نواز، پھر شاہدخاقان عباسی کی ہوگی۔

بشکریہ جنگ