15 اگست کو جب طالبان افغان دارالحکومت کابل میں داخل ہوئے تو امریکی فضائیہ کے ایک طیارے نے 823 افغان شہریوں کو جن میں 183 بچے بھی شامل تھے، بحفاظت وہاں سے نکال لیا۔

یہ تعداد بوئنگ سی 17 گلوب ماسٹر تھری کے لیے ایک ریکارڈ تھا، چار انجن والا یہ ٹرانسپورٹ طیارہ حامد کرزئی ایئرپورٹ سے لوگوں کو لے جانے میں مرکزی کردار ادا کر رہا ہے۔

80 کی دہائی میں تیار کیا گیا یہ طیارہ پہلی بار 90 کی دہائی میں اڑایا گیا تھا اور اب سے اسے دنیا بھر کے ممالک میں فوجیوں، سازو سامان اور بعض اوقات خطرے میں گھرے لوگوں کو ایک جگہ سے دوسری جگہ منتقل کرنے کے لیے استعمال کیا جاتا ہے۔

ایک افغان خاتون نے اتوار کو سی 17 طیارے پر ایک بچی کو جنم بھی دیا ہے۔ جب وہ جرمنی کے رامسٹین ایئر بیس کی طرف جا رہی تھی تو انھیں در زہ شروع ہوا اور طبی عملے نے طیارے کے لینڈ کرنے کے بعد سامان رکھنے والے حصے میں بچی کی ڈلیوری میں مدد کی۔

امریکی فضائیہ کی اس طیارے سے متعلق فیکٹ شیٹ کے مطابق اس پر 77 ہزار پانچ سو 19 کلوگرام وزن لادا جاسکتا ہے۔

بکتر بند گاڑیاں، لاریاں اور یہاں تک کہ ایم 1 ابرامس جنگی ٹینک بھی اس طیارے پر سوار ہو سکتے ہیں۔

یہ بھی پڑھیے

امریکی طیارے میں سینکڑوں افغان شہری، اس تصویر کے پیچھے کہانی کیا ہے؟

لوگ صرف ایک سوٹ کیس تھامے طالبان سے بھاگ رہے ہیں

’میں یقینی طور پر قتل کر دی جاؤں گی۔۔۔ دنیا والو تمھیں معلوم ہے یہاں کیا ہو رہا ہے؟

صحافیوں کی دعوت، بغیر داڑھی اور ویزا اینٹری: طالبان کا افغانستان کیسا تھا؟

اس طیارے کا عملہ تین افراد پر مبنی ہوتا ہے، جس میں دو پائلٹ اور ایک ’لوڈ ماسٹر‘ شامل ہوتا ہے۔ سامان کو طیارے کے عقبی حصے میں کارگو ریمپ کے ذریعے لادا جاتا ہے۔

خلیجی ریاستوں نے امریکہ اور دیگر ممالک کی پروازوں کو انخلا کے عمل کے دوران اپنے فضائی اڈے استعمال کرنے کی اجازت دی ہے۔

امریکہ کو جمعہ کے روز اپنی انخلا کی پروازوں کو تھوڑے عرصے کے لیے اُس وقت روکنا پڑا تھا جب قطر کے دارالحکومت دوحہ میں ان کی پروسیسنگ کی سہولیات بڑی تعداد میں آنے والوں کی وجہ سے دباؤ کا شکار ہو گئی تھی۔

برطانیہ نے طویل مدتی منصوبے کے تحت 20 ہزار افغان مہاجرین کو پناہ دینے کا وعدہ کیا ہے اور کینیڈا نے بھی اتنی ہی تعداد میں لوگوں کو پناہ دینے کے منصوبے کا اعلان کیا ہے۔

تاہم امریکہ اور جرمنی سمیت کئی دیگر ممالک نے ابھی یہ نہیں بتایا کہ وہ کتنے مہاجرین کو پناہ دیں گے۔

حکام انخلا کے عمل کو تیز کرنے کی کوشش کر رہے ہیں۔ اتوار کو پینٹاگون کے ایک بیان میں کہا گیا تھا کہ حکومت 18 کمرشل طیارے استعمال کرے گی تاکہ لوگوں کو ملک سے باہر منتقل کیا جا سکے۔