بین الاقوامی پائلٹس تنظیم کا کابل ایئر پورٹ کیلئے نیا سیفٹی ہدایت نامہ جاری

افغانستان کی صورتِ حال اور کابل ایئر پورٹ پر ایئر ٹریفک سروس کے حوالے سے پائلٹس کی بین الاقوامی تنظیم (انٹرنیٹنل فیڈریشن آف ایئر لائن پائلٹس ایسوسی ایشن) نے نیا سیفٹی ہدایت نامہ جاری کر دیا۔

پائلٹس کی بین الاقوامی تنظیم کا اپنے نئے سیفٹی ہدایت نامے میں کہنا ہے کہ کابل کی فضائی حدود میں انتہائی کم ایئر ٹریفک سروس مہیا کی جا رہی ہے، کابل آنے اور جانے والی فلائٹس کو زیادہ اونچائی پر فلائنگ کی ہدایت کی گئی ہے۔

ہدایت نامے میں پائلٹس کی بین الاقوامی تنظیم نے کہا ہے کہ کابل انٹر نیشنل ایئر پورٹ پر ری فیولنگ کی سہولت موجود نہیں، اس لیے کابل جانے والی فلائٹس واپسی کا فیول لازمی رکھیں، افغان سول ایوی ایشن سے جاری کردہ معلومات مکمل طور اپ ڈیٹ نہیں۔

جاری کیئے گئے ہدایت نامے میں کہا گیا ہے کہ کابل ایئر پورٹ کی نوٹم تفصیلات امریکی دفاعی ادارے کی ویب سائٹ پر موجود ہیں، جہاز کے لیے ریمپ سروس صرف 30 منٹ تک مہیا ہو گی، کابل ایئر پورٹ پر مسافروں کے جہاز میں چڑھنے اور اترنے کا وقت بھی آدھا گھنٹہ ہو گا۔

پائلٹس کی بین الاقوامی تنظیم نے اپنے ہدایت نامے میں یہ بھی کہا ہے کہ ایئر لائنز کے کپتان اپنے ادارے کے احکامات کو مدِ نظر رکھ کر عمل کریں، کابل ایئر پورٹ پر فلائٹس کے لیے پہلے سے اجازت لینا لازمی ہو گا، ٹرانزٹ فلائٹس کو فی الحال کوئی سروس مہیا نہیں ہو گی۔

بشکریہ جنگ