رواں مالی سال 29 ارب 37 کروڑ ڈالر کی ترسیلاتِ زر موصول

بیرونِ ملک مقیم پاکستانیوں کی جانب سے جون میں 2 ارب 68 کروڑ ڈالر کی ترسیلاتِ زر پاکستان بھیجی گئیں۔

اسٹیٹ بینک آف پاکستان کے مطابق جون کی ترسیلاتِ زر شامل کر لینے کے بعد مالی سال 21-2020ء کی ترسیلاتِ زر 29 ارب 37 کروڑ ڈالر رہیں۔

رواں برس کی ترسیلاتِ زر گزشتہ مالی سال کے مقابلے میں 27 فیصد زائد ہیں۔

بیرون ملک مقیم پاکستانیوں کی جانب سے 2 ارب ڈالر ترسیلات بھیجنے کی جھڑی تیرہویں مہینے میں تارکین ہم وطنوں نے 2 ارب 68 کروڑ ڈالر پاکستان بھیجے ہیں۔

مالی سال 20-2019ء میں ترسیلاتِ زر کا حجم 23 ارب ڈالر تھا۔

اسٹیٹ بینک اعداد کے مطابق رواں مالی سال میں سعودی عرب میں مقیم پاکستانیوں نے 7 ارب 66 کروڑ ڈالر کی ترسیلاتِ زر وطن بھیجی ہیں۔

متحدہ عرب امارات سے 6 ارب 61 کروڑ ڈالر جبکہ دیگر گلف ممالک سے 3 ارب 30 کروڑ ڈالر موصول ہوئے ہیں۔

اسٹیٹ بینک آف پاکستان کے مطابق ترسیلات زر کی شرح گزشتہ سال مئی کی نسبت رواں سال مئی میں 34 فیصد زیادہ ہوگئی۔

رواں مالی سال میں برطانیہ سے 4 ارب 6 کروڑ ڈالر، امریکا سے 2 ارب 75 کروڑڈالر اور یورپی یونین سے 2 ارب 70 کروڑ ڈالر کی ترسیلاتِ زر موصول ہوئیں۔

یہ ترسیلاتِ زر 1 سال میں بالترتیب 58، 58 اور 52 فیصد بڑھی ہیں۔

بشکریہ جنگ