’میں ہر وقت اضطراب میں مبتلا رہتا ہوں‘: وہ قیدی جنھیں امریکی تاریخ میں پہلی مرتبہ نائٹروجن گیس کے ذریعے سزائے موت دی جائے گی
- مصنف, ٹوم بیٹ مین
- عہدہ, بی بی سی نیوز
- ایک گھنٹہ قبل
انتباہ: اس مضمون میں سزائے موت کے متعدد طریقے زیرِ گفتگو آئیں گے جو شاید کچھ قارئین کے لیے تکلیف دہ ہوں۔جب پہلی مرتبہ کینیتھ کو سزائے موت دی جانی تھی تو الاباما کی جیل کے جلادوں کے پاس انھیں موت کے گھاٹ اُتارنے کے لیے متعدد گھنٹے تھے۔انھوں نے سزائے موت کے اس مجرم کے چہرے کو نقاب سے ڈھک دیا اور انھیں جیل کے ’ڈیتھ چیمبر‘ میں لے گئے۔ جلادوں نے جان لیوا کیمیکلز کا محلول اُن کے جسم میں اُتارنے کی کوشش کی لیکن وہ ناکام رہے۔ یاد رہے کہ امریکہ میں موت کی سزا ٹیکے کے ذریعے جان لیوا کیمیکل مجرم کے جسم میں داخل کر کے دی جاتی ہے۔جلادوں کو انجیکشن لگانے کے لیے مجرم کی نس (نبض) ہی نہیں مل پائی اور کینیتھ کے وکیلوں کے مطابق اس ضمن میں جیل حکام کی جانب سے کی جانے والی کوششوں کے باعث کینیتھ کے جسم پر متعدد زخم ہو گئے۔
پھر جلادوں نے کینیتھ کو سزائے موت دینے کی کوششیں ترک کر دیں کیونکہ گھڑی نے رات کے 12 بجا دیے تھے اور تاریخ بدل جانے کی وجہ سے ڈیتھ وارنٹ ایکسپائر ہو گئے تھے۔یہ واقعہ 22 نومبر 2022 کو ہوا تھا۔ اب الاباما کے جلاد انھیں ایک بار پھر سزائے موت دینے کی کوشش کریں گے۔اس بار امریکی ریاست نے کینیتھ کو سزائے موت دینے کے لیے لیے نئے طریقے کی منظوری دی ہے۔ ان کے منھ پر ایک ماسک باندھ دیا جائے گا جس میں سے نائٹرجن گیس نکلے گی جو کہ اُن کے جسم میں موجود تمام آکسیجن کو چوس لے گی اور یوں ان کی موت واقع ہو جائے گی۔اس حوالے سے اقوامِ متحدہ کے ہائی کمشنر نے گذشتہ ہفتے کہا تھا کہ سزائے موت کے اس طریقہ کار کو کبھِی آزمایا نہیں گیا ہے اور یہ تشدد اور ظلم کے متراف ہے اور اس غیر انسانی عمل کو روکنا چاہیے۔امریکہ کی ایک فیڈرل عدالت میں کینیتھ کے وکلا کی اس ضمن میں اپیل پر ابھی فیصلہ آنا باقی ہے، تاہم عدالت نے سزائے موت کے خلاف حکم امتناع جاری کرنے کی درخواست کو مسترد کر دیا ہے۔سمتھ ان دو افراد میں سے ہیں جنھیں 1989 میں ایک مبلغ کی اہلیہ الیزیبتھ سینیٹ کو قتل کرنے کے الزام میں سزائے موت سنائی گئی تھی۔الیزیبتھ سینیٹ کو چاقو کے وار کر کے قتل کیا گیا تھا اور پیشہ ور قاتلوں نے انھیں قتل کرنے کے عوض ایک ہزار ڈالر معاوضہ لیا تھا۔کینیتھ جدید امریکی تاریخ میں پہلے شخص ہیں جنھیں دو مرتبہ سزائے موت دی جائے گی، یعنی پہلی مرتبہ وہ جب سزائے موت دینے کی کوشش ناکام ہوئی اور اب دوسری مرتبہ نائٹرجن گیس کی مدد سے۔،تصویر کا ذریعہUS Prisons
BBCUrdu.com بشکریہ
body a {display:none;}
Comments are closed.