اہم شخصیات ہماری سپورٹ میں آ گئی ہیں: ہمایوں اختر خان
استحکامِ پاکستان پارٹی کے رہنما اور این اے 97 سے امیدوار ہمایوں اختر خان کا کہنا ہے کہ ہماری انتخابی مہم کا پہلا دن ہے، اہم شخصیات ہماری سپورٹ میں آ گئی ہیں۔
فیصل آباد میں میڈیا سے گفتگو کرتے ہوئے ہمایوں اختر خان نے کہا کہ 76 سال سے تاندلیانوالہ کا یہ حلقہ آزما رہا ہے، 76 سال سے لوگوں کو بنیادی سہولتیں نہیں مل سکیں۔
انہوں نے کہا کہ جن لوگوں نے اس علاقے کی پگ سنبھالی ان لوگوں نے تاندلیانوالہ کو کیا دیا؟ اس تاندلیانوالہ میں انڈسٹری لگا کر خدمت کر رہے ہیں، اس سے قبل تاندلیانوالہ کے لوگوں کے پاس کوئی چوائس نہیں تھی۔
ہمایوں اختر خان کا کہنا ہے کہ 8 سال پاکستان کا وزیر رہا، کئی سال پارلیمنٹ میں رہا ہے، کئی دہائیوں سے تاندلیانوالہ سے تعلق ہے، ہر کاشت کار سے ہماری انڈسٹری کا تعلق ہے، اب باقی سیاسی زندگی اس علاقے کے لیے وقف کرنا چاہتا ہوں۔
آئی پی پی کے رہنما نے کہا کہ تاندلیانوالہ کی تمام برادری کے لوگ قابلِ احترام ہیں، فوج کے چار ستاروں والے شہید کا بیٹا ہوں، برادری ازم چھوڑ کر علاقے کی تعمیر و ترقی کو ترجیح دیں، اہلِ علاقہ کو علاقے کی تقدیر بدلنے کا موقع مل رہا ہے، ہم تجربہ کار ہیں، معلوم ہے تاندلیانوالہ کو اسلام آباد تک رسائی کیسے دلانی ہے۔
ان کا یہ بھی کہنا ہے کہ تاندلیانوالہ کو ترقی دلا کر قومی سطح پر پہچان دلائیں گے، تاندلیانوالہ میں کوئی گاؤں نہیں رہے گا جہاں سڑک نہ ہو، ڈسپنسری نہ ہو، کسانوں کے لیے ویئر ہاؤسز بنیں گے، فصلیں ایکسپورٹ کرائیں گے، نوجوانوں کو ہنر سکھا کر روزگار کے مواقع دیں گے۔
Comments are closed.