راؤ انوار کے تمام الزامات بےبنیاد ہیں، شازیہ مری

راؤ انوار کے پیپلز پارٹی قیادت اور سندھ حکومت پر الزامات سے متعلق پی پی کا ردِ عمل آگیا جس میں ان الزامات کو بےبنیاد قرار دیا گیا ہے۔ 

ترجمان پاکستان پیپلز پارٹی پارلیمنٹیرینز (پی پی پی پی) شازیہ مری کا کہنا ہے کہ راؤ انوار جعلی پولیس مقابلوں کی شہرت رکھنے والا بدنام زمانہ سیریل کلر ہے۔

انہوں نے کہا کہ راؤ انوار کے تمام الزامات بے بنیاد ہیں، ایسا لگتا ہے جیسے وہ کوئی اسکرپٹ پڑھ رہا ہو۔

ترجمان پی پی پی پی کا کہنا تھا کہ بلاول بھٹو زرداری اس وقت سب سے فعال سیاسی رہنما ہیں لیکن کچھ لوگوں کو یہ اچھا نہیں لگ رہا۔

انہوں نے مزید کہا کہ ایک عرصے سے پیپلز پارٹی کا میڈیا ٹرائل ہو رہا ہے، پیپلز پارٹی کی ساکھ کو ایسے اوچھے ہتھکنڈوں سے کوئی فرق نہیں پڑتا۔

بشکریہ جنگ