تاریخ گواہ ہے کہ عوام کو مہنگائی سے نجات ن لیگ دلاتی ہے: شہباز شریف
پاکستان مسلم لیگ ن کے صدر شہباز شریف کا کہنا ہے کہ تاریخ گواہ ہے کہ عوام کو مہنگائی سے نجات صرف مسلم لیگ ن دلاتی ہے، انتخابات میں مہنگائی سے عوام کو نجات دلانے کے لیے حصہ لے رہے ہیں۔
ایک بیان میں شہباز شریف نے کہا کہ متفقہ قومی معاشی منشور ہی پاکستان کو مسائل کی دلدل سے نکال سکتا ہے، انتخابات میں کامیابی ملی تو نواز شریف کی قیادت میں قومی ترقی کے معاشی منشور پر عمل کریں گے۔
انہوں نے کہا کہ چارٹر آف اکانومی کی تجویز قائد حزب اختلاف کے طور پر دی تھی جس پر آج پوری قوم متفق ہو چکی ہے، سیاسی اور جذباتی بیانات سے نہیں پالیسی اقدامات سے معیشت بحال اور عوام کو مہنگائی سے نجات ملے گی۔
سابق وزیرِ اعظم کا کہنا ہے کہ عوام مہنگائی سے نجات اور معاشی خوشحالی چاہتے ہیں، روزگار مہیا کریں گے اور غربت کا خاتمہ کریں گے، ان شاء اللّٰہ بجٹ خسارا کم کرنا ترجیحات میں شامل ہے۔
شہباز شریف نے کہا کہ نواز شریف نے ہمیشہ پاکستان کی معیشت کو سنوارا، پورے پاکستان کو مساوی بنیادوں پر ترقی دی، زرعی انقلاب لائیں گے، صنعت، معدنیات اور آئی ٹی کے شعبوں میں مثالی ترقی ہو گی۔
مسلم لیگ ن کے صدر کا کہنا ہے کہ 2000 ارب روپے کے زرعی پیکج نے معاشی بہتری اور زرعی شعبے کی بحالی میں اہم کردار ادا کیا، کاروبار میں آسانی لاکر سازگار معاشی ماحول پیدا کرنا ہے، عوام انتخابات میں واضح اکثریت دیں تاکہ پاکستان کو معاشی خود انحصاری ملے، عوام کو مہنگائی سے نجات ملے۔
ان کا کہنا ہے کہ برآمدات میں اضافہ کر کے معاشی پائیداری یقینی بنائیں گے، نوجوانوں کو ہنر مند بنائیں گے، اسٹارٹ اپس کی معاونت اور سرپرستی کر کے کاروباری سرگرمیوں میں تیزی لائیں گے۔
انہوں نے مزید کہا کہ نوجوانوں کو آئی ٹی کے شعبے کی ترقی کا مرکز و محور بنائیں گے، آئی ٹی کے فروغ سے نوجوانوں کے روزگار اور زرمبادلہ میں اضافے کے دونوں اہداف حاصل ہوں گے، معاشی ترقی کی طرف توجہ دینا ہو گی، معاشرے کو نفرت، گالم گلوچ کے کلچر سے پاک کرنا ہے۔
شہباز شریف کا یہ بھی کہنا ہے کہ عوام نے ووٹ دیا تو نواز شریف کی قیادت میں مسلم لیگ ن کی توجہ عوامی مسائل کے حل پر ہو گی، نوجوان، کسان، مزدور، محنت کش، دیہاڑی دار، بیوہ، یتیم اور کمزور طبقات کے مسائل کے حل پر خصوصی توجہ ہو گی۔
Comments are closed.