دنیا کے امیر ترین بھارتی کرکٹ بورڈ کی جگ ہنسائی

دنیا کا امیر ترین بھارتی کرکٹ بورڈ (بی سی سی آئی) جگ ہنسائی کا سبب بن گیا۔

بھارتی میڈیا رپورٹ کے مطابق بھارت اور آسٹریلیا کے درمیان چوتھے ٹی 20 میچ کی میزبانی کرنے والے رائے پور اسٹیڈیم میں بجلی ہی میسر نہیں کیونک اسٹیڈیم کا بجلی کا بل ہی ادا نہیں ہوا۔

رپورٹ کے مطابق اسٹیڈیم کا 10 کروڑ 61 لاکھ روپے کا بل ادا نہ ہونے کے باعث اسٹیڈیم کے بجلی کا کنکشن 5 سال قبل کاٹ دیا گیا تھا۔

بھارتی میڈیا کے مطابق بجلی کا بل 2009 سے ادا نہیں کیا گیا، جس کی وجہ سے اسٹیڈیم کا بجلی کا کنکشن 5 سال قبل کاٹ دیا گیا تھا۔

چھتیس گڑھ کرکٹ ایسوسی ایشن کی درخواست پر عارضی طور پر بجلی کا کنکشن دے دیا گیا۔

میڈیا رپورٹ کے مطابق عارضی کنکشن میں صرف تماشائیوں کی گیلری اور باکسز کو بجلی کا کنکشن دیا گیا جبکہ میچ کے دوران اسٹیڈیم کے فلڈ لائٹس کو جنریٹر سے چلایا جائے گا۔

بھارتی میڈیا کے مطابق پبلک ورکس ڈپارٹمنٹ اور اسپورٹس ڈپارٹمنٹ بل ادا نہ ہونے پر ایک دوسرے پر ذمے داری ڈالنے میں لگے ہیں۔

بشکریہ جنگ