سفید چھڑی کا عالمی دن، صدر اور اسپیکر کا پیغام

صدرِ مملکت ڈاکٹر عارف علوی اور اسپیکر قومی اسمبلی راجہ پرویز اشرف نے سفید چھڑی کے عالمی دن کے موقع پر خصوصی پیغامات جاری کیے ہیں۔

صدر عارف علوی نے اپنے پیغام میں کہا کہ یہ دن منانے کا مقصد بینائی سے محروم افراد پر اجتماعی توجہ مرکوز کرنا ہے۔

اُنہوں نے کہا کہ میں سب سے اپیل کرتا ہوں کہ بصارت سے محروم افراد کاخصوصی احساس کریں۔

صدر عارف علوی نے کہا کہ ہمیں بصارت سے محروم افراد کو درپیش مسائل سے نمٹنے کے لیے کوششیں تیز کرنے کی ضرورت ہے۔

راجہ پرویز اشرف نے اس عالمی دن کے موقع پر کہا کہ بصارت سے محروم افراد کےحقوق کا تحفظ اور سہولتوں کی فراہمی اجتماعی ذمے داری ہے۔

اُنہوں نے کہا کہ بصارت سے محروم افراد بے پناہ صلاحیتوں کے مالک ہوتے ہیں، بصارت سے محروم افراد ملک کی تعمیر و ترقی میں اہم کردار ادا کر سکتے ہیں۔

اسپیکر قومی اسمبلی نے یہ بھی کہا کہ بصارت سے محروم افراد کی محرومی انہیں آگے بڑھنے سے نہیں روک سکتی۔

بشکریہ جنگ