سینیٹ کمیٹی میں غزہ پر اسرائیلی جارحیت کیخلاف مذمتی قرارداد منظور

سینیٹر ولید اقبال کی زیر صدارت سینیٹ کی قائمہ کمیٹی برائے انسانی حقوق کا اجلاس اسلام آباد میں ہوا۔ جس میں غزہ پر اسرائیلی جارحیت کیخلاف مذمتی قرار داد منظور کرلی گئی۔ 

قرار داد چیئرمین کمیٹی ولید اقبال نے پیش کی، جسے متفقہ طور پر منظور کرلیا گیا۔

قرارداد کے مطابق اسرائیل کی جانب سے فلسطینیوں پر مسلط جنگ کی مذمت کرتے ہیں۔ اسرائیل غزہ میں محصور 23 لاکھ معصوم فلسطینیوں کو نشانہ بنا رہا ہے۔ 

قرارداد میں مزید کہا گیا کہ غزہ کی آدھی آبادی بچوں اور خواتین پر مشتمل ہے، جہاں خوراک، ادویات اور پانی کی قلت پیدا ہوچکی ہے۔

قرارداد کے مطابق غزہ کے محصورین 16 سال سے غیرقانونی پابندیوں کا شکار ہیں۔ اسرائیل کی جارحیت عالمی امن کیلئے خطرہ ہے۔ 

قرارداد میں مطالبہ کیا گیا کہ بین اقوامی برادری اور اقوام متحدہ اس حوالے سے فوری مداخلت کرے اور اسرائیل کی جانب سے جارحیت کو فوری طور پر روکا جائے۔

بشکریہ جنگ