کرکٹ ورلڈ کپ میں آج دو میچز کھیلے جائیں گے
آج کرکٹ ورلڈ کپ کے تیسرے روز دو میچز کھیلے جائیں گے جس میں افغانستان کا مقابلہ بنگلادیش سے ہوگا جبکہ سری لنکا اور جنوبی افریقا کی ٹیمیں آمنے سامنے آئیں گی۔
میگا ایونٹ میں آج پہلے میچ میں افغانستان کا بنگلادیش کے ساتھ مقابلہ دھرم شالہ میں صبح دس بجے شروع ہوگا۔
افغانستان کی ٹیم کو اچھے اسپنرز کے سبب بنگلادیش پر کچھ برتری حاصل ہے تاہم بنگلادیش کے بیٹر مہدی حسن میراز عمدہ فارم میں ہیں، ورلڈ کپ کے دونوں وارم اپ میچز میں اُنہوں نے نصف سنچریاں اسکور کی تھیں۔
کپتان اور تجربہ کار آل راؤنڈر شکیب الحسن بھی چل گئے تو بنگلادیش کی جیتنے کی اُمیدیں بڑھ جائیں گی، اس کے علاوہ نجم الحسن شنٹو بھی اُن کے پاس ہیں۔
افغان بیٹرز رحمان اللّٰہ گرباز اور ابراہیم زادران کا بھی اس میچ میں کردار اہم ہوگا، دونوں ٹیموں نے دو مرتبہ ورلڈ کپ مقابلوں میں ایک دوسرے کا سامنا کیا ہے ، ان دونوں میچز میں بنگلادیش کامیاب رہا۔
آج کے دوسرے میچ میں جنوبی اور سری لنکا کی ٹیمیں آمنے سامنے ہوں گی۔ نئی دہلی کے گرم موسم میں جنوبی افریقا اور سری لنکا کے درمیان کھیلے جانے والے اس میچ میں جنوبی افریقا کی بیٹنگ کو سری لنکن اسپنرز کے چیلنجز کا سامنا ہوگا۔
کہا جارہا ہے کہ نئی دہلی کا موسم سری لنکن ٹیم کے حق میں جا سکتا ہے تاہم سری لنکن ٹیم کی بیٹنگ پر سوالیہ نشان ہے جبکہ اُن کی بولنگ بھی مہیش تھکشانا کی غیر موجودگی میں کمزور دکھائی دے رہی ہے۔
دوسری جانب جنوبی افریقا کی بیٹنگ اپنے جوبن پر ہے اور بھارت میں جس طرح کی پچز ہیں اُس پر اُن کے بیٹرز رنز کے انبار لگاسکتے ہیں البتہ بولنگ میں نورکیا اور سیساندا ماگالا کی غیر موجودگی سے فرق پڑے گا۔
ورلڈ کپ میں سری لنکا اور جنوبی افریقا کے درمیان چھ مقابلے ہوئے ہیں جس میں سے چار جنوبی افریقا نے جیتے ہیں جبکہ ایک میچ سر ی لنکا کے نام رہا ہے، ایک میچ ٹائی رہا۔
Comments are closed.