عام انتخابات فروری 2024ء میں ہوں گے، رانا ثناء

سابق وزیر داخلہ رانا ثناء اللّٰہ نے عام انتخابات فروری 2024ء میں ہونے کا دعویٰ کردیا۔

جیو نیوز کے پروگرام ’آج شاہزیب خانزادہ کے ساتھ‘ میں گفتگو کے دوران رانا ثناء اللّٰہ نے کہا کہ پارٹی قائد اور سابق وزیراعظم نوازشریف کو بھی فروری 2024ء میں الیکشن کا پورا یقین ہے۔

سابق وزیر اعظم نواز شریف ستمبر کے وسط میں پاکستان پہنچیں گے، شریف فیملی کے ذرائع نے جیو نیوز کو تصدیق کر دی۔

انہوں نے کہا کہ عام انتخابات رواں برس اکتوبر میں ہوتے تو نواز شریف اب تک واپس آچکے ہوتے، الیکشن آئندہ برس فروری میں ہوں گے۔

سابق وزیرداخلہ نے مزید کہا کہ نواز شریف کی وطن واپسی کےلیے ستمبر یا اکتوبر مناسب وقت ہے لیکن وہ کب آئیں گے؟ یہ اعلان قائد خود کریں گے یا پارٹی کرے گی۔

اُن کا کہنا تھا کہ پاکستان آمد پر نواز شریف کا فقید المثال استقبال کریں گے، وہ واپسی پر ن لیگ کی انتخابی مہم چلائیں گے۔

مسلم لیگ ن کے رہنما طلال چوہدری نے کہا ہے کہ نواز شریف جب بھی آئیں گے تاریخ کا اعلان جماعت کرے گی، انہوں نے اپنے آنے کا فیصلہ جماعت پر چھوڑا ہے۔

رانا ثناء اللّٰہ نے یہ بھی کہا کہ نواز شریف نے 2 مرتبہ ملک کو بحران سے نکالا، موجود ہ حالات میں بھی قوم اُن ہی کی بات سنے گی۔

انہوں نےکہا کہ نگراں سیٹ اپ کے ساتھ ملک آگے نہیں چل سکتا ہے، اسٹیبلشمنٹ بھی الیکشن 90 دن میں ہی چاہتی تھی۔

سابق وزیر داخلہ نے کہا کہ ہمیں کوئی اعتراض نہیں ہے کہ پاکستان تحریک انصاف (پی ٹی آئی) اپنے انتخابی نشان پر الیکشن لڑے۔

اُن کا کہنا تھاکہ 9 مئی کے جتھے کے کسی رکن کوانتخابات میں حصہ لینے کی اجازت نہیں ہونی چاہیے۔

رانا ثناء اللّٰہ نے کہا کہ ریاست پرحملہ کرنے والوں کو اسی ریاست میں سیاست کرنے کا حق نہیں ہونا چاہیے، 9 مئی واقعات میں ملوث افراد کے خلاف ثبوت موجود ہیں۔

بشکریہ جنگ