پاکستان کشمیریوں کی آواز بن کر پوری دنیا میں گونجے گا، وزیراعلیٰ سندھ

وزیراعلیٰ سندھ سید مراد علی شاہ نے کہا ہے کہ پاکستان کشمیریوں کی آواز بن کر پوری دنیا میں گونجے گا۔

سید مراد علی شاہ نے یومِ استحصال کشمیر پر پیغام میں کہا کہ کشمیریوں پر بھارتی مظالم انسانیت سوز ہیں، بھارت جارحانہ اقدامات سے کشمیریوں کو حقِ رائے دہی سے محروم نہیں رکھ سکتا۔

مراد علی شاہ نے کہا کہ بھارت کا مکرو چہرہ دنیا پر آشکار ہوچکا ہے، پوری دنیا کو کشمیر پر ڈھائے گئے مظالم کے خلاف آواز بلند کرنی ہوگی۔

بھارت کی جانب سے مقبوضہ جموں و کشمیر کی خصوصی حیثیت ختم کرنے کے 4 سال مکمل ہونے پر آج دنیا بھر میں کشمیری یوم استحصال منا رہے ہیں۔

وزیراعلیٰ سندھ کا کہنا ہے کہ کشمیر پاکستان کا اٹوٹ انگ ہے اور ہم ہر فورم پر کشمیر کی آواز بنیں گے۔

انہوں نے کہا  کہ 5 اگست 2019 کے اقدام نے بھارت کے دوغلے سیکولرازم کا بھانڈا پھوڑ دیا۔

بشکریہ جنگ