آمدن سے زائد اثاثے کیس: سراج درانی کی درخواستِ ضمانت سماعت کیلئے منظور

سندھ ہائی کورٹ نے آمدن سے زائد اثاثے کے کیس میں اسپیکر سندھ اسمبلی آغا سراج درانی کی درخواستِ ضمانت سماعت کے لیے منظور کر لی۔

آغا سراج درانی کے وکیل جعفر رضا ایڈووکیٹ نے عدالت میں دلائل دیتے ہوئے کہا کہ آغا سراج درانی 1 سال 8 ماہ جیل میں گزار چکے ہیں، اتنی مدت جیل میں گزارنے پر ملزم ضمانت کا مستحق ہے۔

سندھ ہائی کورٹ نے قرار دیا کہ درخواستِ ضمانت پر سماعت 20 جولائی کو ہو گی۔

اسپیکر سندھ اسمبلی آغا سراج درانی کا کہنا ہے کہ میرے سب جیل میں ہوتے ہوئے پروٹوکول لینے کی بات غلط ہے۔

عدالت نے نیب کو تفتیشی افسر کی حاضری یقینی بنانے کی ہدایت کر دی۔

واضح رہے کہ آغا سراج درانی آمدن سے زائد اثاثے بنانے کے الزام میں جیل میں ہیں۔

محکمۂ داخلہ سندھ نے آغا سراج درانی کے گھر کو سب جیل قرار دے رکھا ہے۔

بشکریہ جنگ