اعجاز چوہدری کو جیل میں گھر کا کھانا دینے کیلئے درخواست دائر

لاہور ہائی کورٹ میں پاکستان تحریک انصاف (پی ٹی آئی) کے سینیٹر اعجاز چوہدری کو جیل میں گھر کا کھانا دینے کے لیے درخواست دائر کر دی گئی۔

اعجاز چوہدری کی اہلیہ سلمیٰ اعجاز نے آئینی درخواست دائر کی ہے۔

درخواست میں ہوم سیکریٹری، آئی جی اور سپرنٹنڈنٹ کوٹ لکھپت جیل کو فریق بنایا گیا ہے۔

درخواست میں مؤقف اپنایا گیا ہے کہ اعجاز چوہدری سول انجینئرنگ ڈگری ہولڈر ہونے کے ساتھ سینیٹر بھی ہیں، وہ  شوگر، جوڑوں کے درد اور بلند فشار خون کے مریض ہیں۔

سلمیٰ اعجاز کی جانب سے درخواست میں استدعا کی گئی ہے کہ اعجاز چوہدری کو معاشرے میں حاصل مقام اور تعلیم کی وجہ سے جیل میں بی کلاس کی سہولت دی جائے۔

درخواست میں یہ بھی استدعا کی گئی ہے کہ اعجاز چوہدری کو بیماری کی وجہ سے گھر کا کھانا فراہم کرنے اور اہلخانہ کو ملنے کی اجازت دی جائے۔

بشکریہ جنگ