پاکستان کی خواتین کرکٹرز پاکستان کپ میں ایکشن میں نظر آئیں گی

پاکستان کی بہترین خواتین کرکٹرز پاکستان کپ ویمنز کرکٹ ٹورنامنٹ میں ایکشن میں نظر آئیں گی، یہ ٹورنامنٹ 19 مئی سے کراچی میں کھیلا جائے گا۔

پاکستان کرکٹ بورڈ (پی سی بی) کی جانب سے جاری اعلامیے کے مطابق اس ٹورنامنٹ کا مقصد کھلاڑیوں کو محدود اوورز کی کرکٹ کے بہترین مواقع فراہم کرنا ہے۔ خاص کر اس ایونٹ سے کھلاڑیوں کو ایمرجنگ ویمنز ایشیا کپ کی تیاری میں بھرپور مدد ملے گی جو آئندہ ماہ ہانگ کانگ میں منعقد ہوگا۔

پاکستان کپ 13 میچوں پر مشتمل ہوگا جو دو مرحلوں میں کھیلا جائے گا، چار ٹیمیں راؤنڈ رابن لیگ کی بنیاد پر ٹی ٹوئنٹی میچز کھیلیں گی جبکہ تین ٹیمیں ون ڈے میچز میں مدمقابل ہونگی۔ یہ میچز ڈبل راؤنڈ رابن لیگ کے تحت کھیلے جائیں گے جس کا فائنل 4 جون کو ہوگا۔

ٹورنامنٹ کے پہلے مرحلے میں اے سی سی ویمنز ایمرجنگ ایشیا کپ کی ممکنہ کھلاڑی میدان میں نظر آئیں گی جس سے انہیں اپنا ٹیلنٹ دکھانے اور صورتحال کے مطابق اپنی مہارت دکھانے کا موقع مل سکے گا۔

ٹورنامنٹ میں شریک اسٹرائیکرز ٹیم کی قیادت فاطمہ ثنا کریں گی، بلاسٹرز کی کپتان منیبہ علی ہونگی جو ٹی ٹوئنٹی انٹرنیشنل میں سنچری بنانے والی واحد پاکستانی کھلاڑی بھی ہیں۔

چیلنجرز کی ٹیم کی قیادت لیفٹ آرم اسپنر سعدیہ اقبال کریں گی جبکہ ڈائنامائٹس کی ٹیم سدرہ امین کی کپتانی میں میدان میں اترے گی۔

ان چار ٹیموں کے درمیان چھ ٹی ٹوئنٹی میچز 19 سے 21 مئی تک حنیف محمد ہائی پرفارمنس سینٹر اوول گراؤنڈ اور اسٹیٹ بینک گراؤنڈ میں کھیلے جائیں گے۔

23 مئی سے بلاسٹرز، چیلنجرز اور ڈائنامائٹس کی ٹیمیں پچاس اوورز پر مشتمل ون ڈے ٹورنامنٹ میں مدمقابل آئیں گی۔

اس ٹورنامنٹ کا فائنل اسٹیٹ بینک گراؤنڈ میں کھیلا جائے گا جسے پی سی بی کے یوٹیوب چینل پر لائیو دکھایا جائے گا۔

پاکستان کرکٹ بورڈ نے ٹورنامنٹ کے لیے نقد انعامات کا اعلان بھی کیا ہے۔ فاتح ٹیم کو 10 لاکھ روپے اور رنر اپ کو 5 لاکھ روپے دیے جائیں گے۔

پلیئر آف دی میچ کے لیے 20  ہزار روپے اور پلیئر آف دی ٹورنامنٹ کے لیے 50  ہزار روپے کا انعام رکھا گیا ہے۔

پاکستان کرکٹ بورڈ کی ویمنز کرکٹ کی سربراہ تانیہ ملک کا کہنا تھا کہ اس ٹورنامنٹ کا بنیادی مقصد ہماری باصلاحیت خواتین کرکٹرز کو اپنی مہارت دکھانے کا موقع فراہم کرنا ہے۔

انہوں نے مزید کہا کہ اسی لیے اس ٹورنامنٹ کو دو مرحلوں میں رکھا گیا ہے تاکہ دو مختلف فارمیٹس کے مختلف چیلنجز سے ان کھلاڑیوں کو تجربہ حاصل ہوسکے۔

تانیہ ملک کے مطابق ٹی ٹوئنٹی فارمیٹ سے ہماری ایمرجنگ ٹیم کو اے سی سی ویمنز ایمرجنگ ٹی ٹوئنٹی ٹورنامنٹ کی تیاری میں مدد ملے گی۔

ان کا کہنا تھا کہ دوسرے مرحلے میں تین ٹیمیں ون ڈے میں مدمقابل ہونگی اور انہیں امید ہے کہ اس ٹورنامنٹ میں اعلی معیار کے مقابلے دیکھنے میں آئیں گے۔

بلاسٹرز: منیبہ علی (کپتان) علینہ شاہ، انعم امین، اسما امین، عائشہ بلال، عائشہ جاوید، عائشہ ظفر، ڈیانا بیگ، فجر نوید، ارم جاوید، کائنات امتیاز، صبا نذیر، صائقہ ریاض، زیب النسا اور زونیرا۔

چیلنجرز: سعدیہ اقبال (کپتان)، آئمہ سلیم، امبر کائنات، عریشہ نور، فریحہ محمود، فاطمہ زہرہ، حورینہ سجاد، جویریہ خان، جویریہ رؤف، کائنات حفیظ، ماہم طارق، معصومہ زہرہ، نورین یعقوب، صائمہ ملک اور وردا یوسف۔

ڈائنامائٹس: سدرہ امین ( کپتان ) عالیہ ریاض، بسمہ معروف، فاطمہ شاہد، غلام مصطفی، ہمنہ بلال، خدیجہ چشتی، لائبہ ناصر، ماہم منظور، نشرہ سندھو، عمیمہ سہیل، رامین شمیم، سدرہ نواز، وحیدہ اختر اور یُسری عامر۔

اسٹرائیکرز: فاطمہ ثنا (کپتان) انوشہ ناصر، دعا ماجد، ایمن فاطمہ، فاطمہ خان، گل فیروزہ، گل رخ، لبنیٰ بہرام، نجیہا علوی، نتالیہ پرویز، صدف شمس، شوال ذوالفقار، سیدہ عروب شاہ، طوبیٰ حسن، ام ہانی۔

بشکریہ جنگ