مظفرگڑھ: مفت آٹا لے جانیوالی خاتون راستے میں دم توڑ گئی

مظفر گڑھ میں آٹے کے حصول کے بعد گھر جانے والی ایک اور خاتون راستے میں دم توڑ گئی جبکہ ملتان میں مفت آٹا پوائنٹ پر شدید گرمی اور حبس کے باعث 2 خواتین بے ہوش ہو گئیں۔

پولیس کے مطابق خان گڑھ میں 70 سالہ خاتون جنت مائی نے آٹا پوائنٹ سے 2 تھیلےحاصل کیے اور آٹا پوائنٹ سے نکلنے کے بعد قریب ہی راستے میں اسے دل کا دورہ پڑ گیا۔

اس حوالے سے پولیس کا کہنا ہے کہ اسپتال منتقلی کے دوران بزرگ خاتون دم توڑ گئی۔

ضلعی انتظامیہ کے مطابق جنت مائی نے آٹے کے تھیلے بغیر رکاوٹ حاصل کیے لیکن وہ دل کی مریضہ تھی۔

ملک بھر میں مفت سرکاری آٹے کے حصول کے لیے شہری اپنی زندگیوں کو خطرے میں ڈال رہے ہیں۔

دوسری جانب ملتان میں پیش آئے واقعے سے متعلق ریسکیو ذرائع کا کہنا ہے کہ دونوں خواتین کو موقع پر ہی طبی امداد فراہم کر دی گئی۔

واضح رہے کہ ضلع مظفر گڑھ اور کوٹ ادو میں آٹا پوائنٹس پر اب تک 3 خواتین سمیت 4 افراد دم توڑ چکے ہیں۔

بشکریہ جنگ