کراچی: یکم مارچ سے 2 نئے روٹس پر پیپلز پنک بس سروس کا آغاز ہوگا

یکم مارچ سے کراچی کے مزید 2 نئے روٹس پر پیپلز پنک بس سروس چلائی جائے گی۔

ان خیالات کا اظہار وزیر ٹرانسپورٹ شرجیل انعام میمن نے پیپلز بس سروس سے متعلق اجلاس کی صدارت کرتے ہوئے کیا۔

اجلاس سے خطاب کرتے ہوئے انہوں نے پاور چورنگی نارتھ کراچی سے انڈس ہاسپٹل روٹ ٹو اور نمائش چورنگی سے کلاک ٹاور سی ویو روٹ- 10 پر یکم مارچ سے پنک بس سروس کے آغاز کا اعلان کیا۔

اس کے علاوہ ان کا کہنا ہے کل سے پنک بس سروس کے ماڈل کالونی سے ٹاور روٹ ون کا فلیٹ بھی بڑھایا جائے گا۔ ماڈل کالونی سے ٹاور پنک بس سروس روٹ ون پر بسوں میں اضافہ کیا جا رہا ہے۔

شرجیل انعام میمن نے این آر ٹی سی کو ہدایت دیتے ہوئے کہا کہ کراچی میں پیپلز بس سروس کے مزید نئے روٹس پر سروے مکمل کیا جائے اور ہاکس بے روڈ تک بھی پیپلز بس سروس چلانے کا جائزہ لیا جائے۔

انہوں نے کہا کہ چاہتا ہوں پیپلز الیکٹرک بس سروس کے مزید نئے روٹس کا بھی جلد آغاز کیا جائے۔

اجلاس میں سیکریٹری ٹرانسپورٹ عبدالحلیم شیخ ، ایم ڈی سندھ ماس ٹرانزٹ اتھارٹی زبیر چنہ، پی ڈی این آر ٹی سی صہیب شفیق ، آپریشن منیجر عبدالشکور و دیگر نے شرکت کی۔

بشکریہ جنگ