ٹیم کا اچھا ماحول پرفارمنس میں مدد دیتا ہے، اعظم خان

اسلام آباد یونائیٹڈ کے جارح مزاج نوجوان بیٹر اعظم خان نے کہا ہے کہ ٹیم کا اچھا ماحول آپ کو پرفارمنس میں مدد دیتا ہے۔ 

ایچ بی ایل پی ایس ایل 8 میں اپنی یادگار اننگز کھیلنے کے بعد مائیکرو بلاگنگ ویب سائٹ ٹوئٹر پر اعظم خان نے اپنا پہلا بیان جاری کیا اور مداحوں سے دلچسپ بات پوچھی۔ 

اعظم خان نے اپنے سامنے کوئٹہ گلیڈی ایٹر کے کسی بولر کی نہ چلنے دی اور اپنے چوکوں اور چھکوں سے ٹیم کو فتح دلوائی۔

اپنے پیغام میں اعظم خان نے کہا ’امید ہے آپ لوگ محظوظ ہوئے ہوں گے۔‘

ان کا کہنا تھا کہ ’ٹیم کی جیت میں حصہ ڈالنے پر ہمیشہ خوشی ہوتی ہے۔‘

نوجوان بیٹر نے کہا کہ ٹیم کا اچھا ماحول آپ کو پرفارم کرنے میں مدد دیتا ہے اور اسلام آباد یونائیٹڈ کی ٹیم کا ماحول بہت اچھا ہے۔ 

اپنی بیٹنگ سے متعلق ان کا کہنا تھا کہ انہوں نے تیز رفتار گیند بازی کے خلاف اپنے کھیل پر سخت محنت کی اور ایسا کرتے رہیں گے۔

اعظم خان نے آخر میں یہ بھی لکھا کہ ’آپ کو ہمیشہ محنت کا پھل ملتا ہے۔‘

واضح رہے کہ کوئٹہ گلیڈی ایٹرز کے خلاف میچ میں اعظم خان نے 42 گیندوں پر 97 رنز کی برق رفتار اننگز کھیلی تھی۔ 

خیال رہے کہ اعظم خان اننگز کے 7ویں اوور میں اس وقت بیٹنگ کرنے آئے جب یونائیٹڈ کی ٹیم 43 رنز پر 3 وکٹوں سے محروم ہوچکی تھی۔

یونائیٹڈ نے 220 رنز بنائے جبکہ ہدف کے تعاقب میں گلیڈی ایٹرز کی ٹیم 157 رنز پر آل آؤٹ ہوئی۔

بشکریہ جنگ