ناظم آباد میں بجلی کی عدم فراہمی پر احتجاج

کراچی میں ناظم آباد نمبر 2 پر ناظم آباد اور اورنگ آباد کے رہائشیوں نے بجلی کی عدم فراہمی کے خلاف کئی گھنٹے تک خواتین اور بچوں سمیت احتجاج کیا، احتجاج کے باعث سائٹ ایریا سے ناظم آباد آنے اور جانے والا ٹریفک معطل ہوگیا۔

ٹریفک پولیس کے مطابق ناظم آباد پر ناظم آباد2 نمبر اور اورنگ آباد کے رہائشیوں نے ایک روز سے بجلی نہ ہونے پر احتجاج کیا۔

مظاہرین خواتین اور بچوں کے ہمراہ سڑکوں پر آگئے، مظاہرے کے سبب ناظم آباد نمبر 2 سے سائٹ ایریا آنے اور جانے والا ٹریفک معطل ہوگیا اور گاڑیوں کی لمبی قطاریں لگ گئیں۔

مظاہرین کا کہنا تھا کہ 24 گھنٹے گزرنے والے ہیں انکے گھر میں بجلی نہیں ہے وہ باقاعدہ بل ادا کررہے ہیں، جب تک لائٹ بحال نہیں کی جاتی ٹریفک کی روانی بحال نہیں کی جائیگی۔

مظاہرین کا احتجاج  کئی گھنٹے تک جاری رہا بعد ازاں کے الیکٹرک نے علاقے کی بجلی بحال کی اور مظاہرین نے احتجاج ختم کرکے روڈ کو ٹریفک کے لیے کھول دیا۔

بشکریہ جنگ