عمران خان کی حفاظتی درخواستِ ضمانت خارج کرنے کا تحریری فیصلہ جاری

پاکستان تحریک انصاف (پی ٹی آئی) کے چیئرمین عمران خان کی حفاظتی ضمانت کی دوسری درخواست خارج کرنے کا تحریری فیصلہ جاری کردیا گیا۔

لاہور ہائیکورٹ کے جسٹس علی باقر نجفی اور جسٹس سید شہباز علی رضوی نے تحریری فیصلہ جاری کیا۔

فیصلے میں کہا گیا ہے کہ عمران خان کی حفاظتی ضمانت کی درخواست شام 5 بجے سماعت کیلئے مقرر کی گئی تھی، وکیل نے عمران خان کو پیش کرنے کے لئے مہلت مانگی تھی۔

پی ٹی آئی چیئرمین کے وکیل نے کہا کہ عدالت کہے گی تو عمران خان پیش ہوجائیں گے، استدعا ہے کہ پیشی کے بغیر ضمانت دے دی جائے۔

تحریری فیصلہ میں مزید کہا گیا ہے کہ عدالت نے کیس کی سماعت ساڑھے 6 بجے تک ملتوی کی تھی، جب سماعت شروع ہوئی تو نا عمران خان اور نا ہی وکیل اظہر صدیق پیش ہوئے۔

عدالت نے تحریری فیصلے میں کہا کہ درخواست گزار اور وکیل کی عدم پیشی پر درخواست خارج کرنے کے سوا کوئی راستہ نہیں تھا۔

عمران خان نے سنگجانی تھانے میں دہشتگردی دفعات کے تحت درج مقدمے میں حفاظتی ضمانت کیلئے درخواست دائر کی تھی۔

بشکریہ جنگ