واشنگٹن سے لندن کیلئے برٹش ایئر ویز کی پرواز میں دھواں، ہیلی فیکس میں ہنگامی لینڈنگ

امریکا کے دارالحکومت واشنگٹن ڈی سی سے لندن کےلیے روانہ ہونے والی برٹش ایئرویز کی پرواز میں آگ لگنے کی اطلاع پر طیارے نے قریبی ایئرپورٹ پر ہنگامی لینڈنگ کی۔ طیارہ اور تمام مسافر محفوظ رہے۔

ایوی ایشن حکام کے مطابق پرواز بی اے 216 کے طور پر بوئنگ 9-787 ڈریم لائنر طیارے نے امریکا کے مقامی وقت کے مطابق شام 6 بجکر 49 منٹ پر واشنگٹن ڈی سی سے برطانیہ کے ہیتھرو لندن ایئرپورٹ کےلیے ٹیک آف کیا۔ 

پرواز کے ایک گھنٹے بعد پائلٹ نے ایئر ٹریفک کنٹرول کو طیارے کے کیبن میں دھواں بھرنے کی اطلاع دی۔ جس پر پرواز کو قریبی ہیلی فیکس ایئرپورٹ پر ہنگامی لینڈنگ کروائی گئی۔ تمام مسافروں اور عملے کو طیارے سے اتار لیا گیا تھا۔

بعدازاں رجسٹریشن (G-ZBkL) کے حامل طیارے کا مکمل معائنہ کیا گیا اور طیارے کو مکمل فٹ قرار دے کر مسافروں کو منزل پر روانہ کر دیا گیا۔

بشکریہ جنگ