مکی آرتھر نے پاکستان کرکٹ ٹیم کی کوچنگ کیلئے وقت مانگ لیا

پاکستان کرکٹ ٹیم کے سابق کوچ مکی آرتھر نے کوچنگ ذمے داریوں سے متعلق پاکستان کرکٹ بورڈ سے وقت مانگ لیا۔

ذرائع کے مطابق پاکستان کرکٹ بورڈ مکی آرتھر کو پاکستان ٹیم کا ہیڈ کوچ بنانے کا خواہشمند ہے، ثقلین مشتاق اور شان ٹیٹ کا معاہدہ 9 فروری کو ختم ہو جائے گا۔

مکی آرتھر کا انگلش کاؤنٹی ڈربی شائر کے ساتھ 3 سال کا معاہدہ ہے، وہ کاؤنٹی کے ساتھ معاملات طے کرنے کے بعد پی سی بی کو جواب دیں گے۔

مکی آرتھر کو پاکستان کرکٹ ٹیم کا کوچ بنانے کا فیصلہ کرلیا گیا، وہ آئندہ چند روز میں کرکٹ ٹیم کے کوچ کا چارج سنبھالیں گے۔

ذرائع کا کہنا ہے کہ مکی آرتھر کی چند ہفتوں میں پاکستان آمد بھی متوقع ہے، فاسٹ بولنگ کوچ کے لیے عمر گل مضبوط امیدوار ہیں اور شاہد آفریدی کی بھی یہی تجویز ہے۔

ذرائع نے کہا کہ پی سی بی پی ایس ایل کے بعد اور سیریز سے قبل طویل المدتی تقرریاں کر لے گا، پی سی بی ورلڈ کپ 2023 تک شاہد آفریدی کو چیف سلیکٹر کی ذمے داریاں دینا چاہتا ہے۔

بشکریہ جنگ