سرفراز احمد کیلئے بھارتی اور بنگلادیشی کرکٹرز کے پیغامات

پاکستان کرکٹ ٹیم کے وکٹ کیپر بیٹر سرفراز احمد کی جہاں پاکستانی مداح اور کرکٹرز تعریفیں کر رہے ہیں، وہیں غیر ملکی کرکٹرز نے بھی نیوزی لینڈ کے خلاف شاندار سنچری اسکور کر کے ٹیم کو یقینی شکست سے بچانے والے سرفراز احمد کے لیے پیغام جاری کیا ہے۔

بنگلا دیش کرکٹ ٹیم کے سابق کپتان مشفق الرحیم نے سرفراز احمد کے لیے سوشل میڈیا اکاؤنٹ پر لکھا ہے کہ ماشاء اللّٰہ بھائی! آپ کو پھر سے ایکشن میں اور رنز بناتا دیکھ کر خوشی ہوئی۔

مشفق الرحیم نے سرفراز احمد کے لیے نیک خواہشات کا اظہار بھی کیا ہے۔

بھارت کے اسپن بولر روی چندرن ایشون نے بھی سرفراز احمد کے لیے سوشل میڈیا پر پیغام لکھا ہے۔

روی چندرن ایشون نے لکھا ہے کہ کراچی ٹیسٹ میچ کے آخری لمحات دیکھے، سرفراز احمد نے واقعی قابلِ ذکر اور بہترین بیٹنگ کر کے سنچری اسکور کی۔

سرفراز احمد نے بھارتی کھلاڑی کے پیغام کو ری ٹوئٹ کیا ہے جبکہ بنگلا دیشی پلیئر کو جواب دیتے ہوئے انہوں نے لکھا ہے کہ اللّٰہ کا شکر ہے بھائی! شکریہ۔

یاد رہے کہ سرفراز احمد نے قومی ٹیم میں واپس آنے کے فوراً بعد نیوزی لینڈ کے خلاف کراچی میں کھیلے گئے 2 ٹیسٹ میچوں میں لگاتار 3 نصف سنچریاں اور ایک سنچری اسکور کی تھی۔

بشکریہ جنگ