سرفراز کو نظرانداز کرنے والے آج خود نظرانداز ہو رہے ہیں، سسر سرفراز احمد

پاکستان کرکٹ ٹیم کے وکٹ کیپر بیٹر سرفراز احمد کے سسر سید آفتاب علی شاہ نے کہا ہے کہ سرفراز احمد کی شاندار اننگز پر بےحد خوش ہوں۔

ہمیں پہلے بھی اپنے داماد کی پرفارمنس پر فخر تھا اور آج بھی اس نے ہمارا سر فخر سے بلند کر دیا ہے۔

ان کا کہنا تھا کہ سرفراز احمد نے بہت کٹھن وقت گزارا ہے، اس کو نظرانداز کرنے والے لوگ آج خود نظرانداز ہو رہے ہیں۔

انہوں نے کہا کہ یہ سارے معاملات اللّٰہ کی طرف سے ہوتے ہیں وہ جب جس کو عزت دینا چاہے، عزت دیتا ہے۔

ان کا کہنا تھا کہ سرفراز کی اس کامیابی میں اس کے والدین، کرکٹ فینز اور پوری قوم کی دعائیں شامل ہیں۔

انہوں نے مزید کہا کہ میں پاکستان کرکٹ بورڈ، عبوری سلیکشن کمیٹی اور شاہد خان آفریدی کا شکرگزار ہوں کہ انہوں نے سرفراز کو کھیلنے کا موقع دیا اور صحافیوں کا بھی شکریہ ادا کرنا چاہوں گا کیونکہ وہ سرفراز کے حق میں بولتے رہے اور مکمل طور پر سپورٹ کرتے رہے۔

سرفراز احمد کے سسر کا کہنا ہے کہ میں جہاں بھی جاتا ہوں لوگ مجھے سرفراز کے حوالے سے جانتے ہیں، مجھے بڑی عزت ملتی ہے، انہوں نے کہا کہ میرے لئے یہ قابل فخر لمحہ ہوتا ہے۔

خیال رہے کہ سرفراز احمد نے نیوزی لینڈ کے خلاف دوسرے ٹیسٹ میں 118 رنز کی اننگز کھیل کر پاکستان کو شکست سے بچانے میں اہم کردار ادا کیا۔

بشکریہ جنگ