پرویز الہٰی کو اعتماد کا ووٹ دلانا PTI کیلئے مشن امپاسیبل بن گیا

پرویز الہٰی کو اعتماد کا ووٹ دلانا پی ٹی آئی کے لیے مشن امپاسیبل بن گیا، پنجاب اسمبلی میں 186 ووٹ حاصل کرنے میں مشکلات کا سامنا، راولپنڈی سے مخصوص نشست پر ایم پی اے بننے والی مومنہ وحید نے بھی پرویز الہیٰ کو اعتماد کا ووٹ نہ دینے کا اعلان کیا ہے۔

ایم پی اے مومنہ وحید کا کہنا ہے کہ پی ٹی آئی کا پرانا کارکن دل برداشتہ ہے، پرویز الہٰی صرف گجرات اورمنڈی بہاء الدین میں ترقیاتی کام کروا رہے ہیں۔

مخصوص نشست پر منتخب زہرا نقوی پہلے ہی پرویز الہٰی کو ووٹ نہ دینے کا اعلان کر چکی ہیں۔

دوسری جانب عمران خان کو آگاہ کردیا گیا ہے کہ 3 ارکان کے پارٹی پالیسی کے خلاف جانے کا خدشہ ہے۔

واضح رہے کہ تحریک انصاف کے دعوے کے مطابق انہیں 187 ارکان کی حمایت حاصل ہے، 2 ارکان کی غیر حاضری کی صورت میں پرویز الہٰی اعتماد کا ووٹ ہار جائیں گے۔

پی ٹی آئی چیئرمین عمران خان نے 11 جنوری سے پہلے ہر صورت میں اعتماد کا ووٹ یقینی بنانے کی ہدایت کر دی ہے۔

اسپیکر پنجاب اسمبلی سبطین خان، عثمان بزدار، اسلم اقبال اور محمود الرشید کو اہم ذمے داریاں سونپ دی گئی ہیں۔

بشکریہ جنگ