خاتون رپورٹر لیونل میسی کے سامنے جذباتی ہو گئیں

ارجنٹینا کے کپتان لیونل میسی سے خاتون رپورٹر نے انٹرویو کے اختتام پر سوال کے بجائے اپنے جذبات بیان کردیے۔

غیرملکی میڈیا کے مطابق سیمی فائنل میں کروشیا کو شکست دینے کے بعد ارجنٹینا کی خاتون رپورٹر لیونل میسی کا انٹرویو کرتے ہوئے اپنے جذبات پر قابو نہ رکھ سکی۔

خاتون رپورٹر نے میسی سے کہا کہ آخری چیز جو میں آپ کو بتانا چاہتی ہوں اور وہ سوال نہیں ہے بلکہ یہ کہ ورلڈ کپ کا فائنل آرہا ہے اور مجھ سمیت ارجنٹینا کے تمام لوگ اسے جیتنا چاہتے ہیں۔

خاتون رپورٹر نے کہا کہ میں آپ کو صرف یہ بتانا چاہتی ہوں کہ نتائج سے کوئی فرق نہیں پڑتا، کچھ ایسی چیز ہے جو کوئی بھی آپ سے نہیں لے سکتا اور یہ حقیقت ہے کہ آپ ارجنٹائن کے ہر ایک شخص کے لیے اہم ہیں۔

ارجنٹینا کی رپورٹر نے لیونل میسی سے کہا کہ میں سنجیدہ ہو کر کہہ رہی ہوں کہ کوئی بچہ ایسا نہیں جس کے پاس ارجنٹینا کی شرٹ نہ ہو.

خاتون صحافی نے کہا کہ آپ نے واقعی سب کی زندگی میں اپنی شناخت بنائی ہے اور یہ میرے نزدیک کسی بھی ورلڈ کپ کو جیتنے سے زیادہ ہے۔

انہوں نے مزید کہا کہ سیکڑوں لوگوں کو خوش کرنے کے لیے میں آپ کی شکرگزار ہوں۔

خاتون رپورٹر کی جانب سے اپنی تعریف سنتے ہوئے لیونل میسی مسکراتے رہے۔

اسٹار فٹبالر کے اس انداز کو سوشل میڈیا پر بہت زیادہ سراہا جارہا ہے۔

واضح رہے کہ فیفا ورلڈ کپ 2022 کے پہلے سیمی فائنل میں لیونل میسی کی ارجنٹینا کروشیا کو 3 صفر سے شکست دے کر چھٹی بار فٹ بال ورلڈ کپ کے فائنل میں پہنچ گئی ہے جہاں فائنل میں اس کا مقابلہ فرانس سے ہوگا۔

بشکریہ جنگ