ٹی ٹوئنٹی ورلڈ کپ کے پہلے سیمی فائنل میں نیوزی لینڈ کا پاکستان کیخلاف پہلے بیٹنگ کا فیصلہ

ٹی ٹوئنٹی ورلڈ کپ کے پہلے سیمی فائنل میں نیوزی لینڈ کی ٹاس جیت کر پاکستان کے خلاف بیٹنگ جاری ہے۔

سڈنی میں پہلے اوور میں ہی شاہین شاہ آفریدی نے کیوی اوپنر کو واپس پویلین بھیج دیا۔

میچ کی تیسری گیند پر شاہین آفریدی نے فن ایلن کو 4 رنز پر ایل بی ڈبلیو آؤٹ کیا۔

سیمی فائنل میچ کے لیے پاکستان ٹیم میں بابر اعظم، شاداب خان، محمد رضوان، شان مسعود، افتخار احمد، محمد حارث، محمد نواز، محمد وسیم جونیئر، شاہین شاہ آفریدی، نسیم شاہ اور حارث رؤف شامل ہیں۔

کپتان کین ولیمسن، فن ایلن، ڈیرل مچل، گلین فلپس، ڈیون کونوے، ٹرینٹ بولٹ، ٹم ساؤتھی، لوکی فرگوسن، جمی نیشم، مچل سینٹنر اور ایش سودھی کیوی ٹیم کا حصہ ہیں۔

ٹاس ہارنے کے بعد کپتان بابر اعظم نے کہا کہ ہمارے پاس اچھے کھلاڑی ہیں، اس میچ پر فوکس ہیں، آخری 3 میچز اچھے کھیلے اس مومینٹم کو برقرار رکھیں گے۔

بابر اعظم نے کہا کہ نیوزی لینڈ کے پاس کوالٹی بولرز اور بیٹرز ہیں تاہم جیت کی وجہ سے ہم بہت زیادہ پُراعتماد ہیں۔

ٹاس سے قبل کپتان بابر اعظم اور نیوزی لینڈ کے کپتان کین ولیمسن نے پچ کا بغور معائنہ بھی کیا۔

پاکستان کرکٹ ٹیم کے مداحوں کی بڑی تعداد بھی سڈنی کرکٹ اسٹیڈیم میں موجود ہے۔

پاکستان کرکٹ بورڈ (پی سی بی) کے ٹوئٹر اکاؤنٹ نے کھلاڑیوں کی اسٹیڈیم روانگی کی ویڈیو بھی شیئر کی تھی۔

پاکستان ٹیم کے کھلاڑیوں کے ہمراہ کوچز بھی موجود تھے۔

دونوں ٹیموں کے درمیان اب تک ورلڈ کپ میں 6 میچز کھیلے گئے ہیں جن میں سے 4 میں پاکستان اور2 نیوزی لینڈ کو فتح ہوئی۔

انٹرنیشنل کرکٹ کونسل (آئی سی سی) ٹی ٹوئنٹی ورلڈ کپ میں نیوزی لینڈ کے خلاف سیمی فائنل سے قبل قومی ٹیم کے 3 سابق کپتانوں نے پاکستانی ٹیم کو مشورہ دے دیا۔

پاکستان اور نیوزی لینڈ کے درمیان اب تک 28 ٹی ٹوئنٹی میچز کھیلے جاچکے ہیں جن میں پاکستان کا ریکارڈ نیوزی لینڈ سے کافی بہتر ہے۔

پاکستان نے نیوزی لینڈ کے خلاف 17 میچ جیتے جبکہ 11 میں گرین شرٹس کو شکست ہوئی۔

ٹی ٹوئنٹی ورلڈ کپ کا دوسرا سیمی فائنل کل بھارت اور انگلینڈ کے درمیان ایڈیلیڈ میں شیڈول ہے۔

ٹی ٹوئنٹی ورلڈ کپ کا فائنل اتوار کو میلبرن میں کھیلا جائے گا۔

بشکریہ جنگ