کراچی: گلستان جوہر کے فلیٹ میں گیس لیکیج سے دھماکا، ماں بیٹی جاں بحق

کراچی کے علاقے گلستان جوہر بلاک 11 کے فلیٹ میں گیس دھماکے سے ماں بیٹی جاں بحق جبکہ 13 افراد شدید زخمی ہوگئے۔

پولیس کے مطابق واقعہ گلستان جوہر بلاک 11 میں راڈو بیکری کے قریب ایک رہائشی عمارت کے فلیٹ میں پیش آیا۔

بم ڈسپوزل اسکواڈ کی رپورٹ کے مطابق فلیٹ کے ایک کمرے میں گیس جمع ہونے سے دھماکا ہوا۔

دھماکے سے فلیٹ نمبر 212، 213 اور 214 کو شدید نقصان پہنچا، رپورٹ کے مطابق دھماکے کے بعد آگ لگنے سے متعدد افراد جھلس گئے۔

دھماکے سے گھر کے در و دیوار کو بھی نقصان پہنچا، ایدھی فاؤنڈیشن کے ترجمان کے مطابق واقعہ میں جھلسنے والے 15 افراد کو سول اسپتال کے برنس سینٹر منتقل کیا گیا تھا۔

علاج کے دوران 40 سالہ خاتون ثناء بشیر احمد اور ان کی اٹھارہ سالہ صاحبزادی علیشبا جاں بحق ہوگئیں جبکہ 13 افراد کو برنس سینٹر میں طبی امداد دی جا رہی ہے۔

بشکریہ جنگ