پاکستان ویمن ٹیم نے آئرلینڈ کو 128 رنز شکست دیدی

پاکستان ویمن کرکٹ ٹیم نے 3 ایک روزہ میچز کی سیریز کے پہلے میچ میں آئرلینڈ ویمن کو 128 رنز سے شکست دے دی۔

قذافی اسٹیڈیم لاہور میں کھیلے جانے والے پہلے ون ڈے میچ میں پاکستان ویمن ٹیم کی اوپنرز سدرا امین اور منیبہ علی ریکارڈ ساز پارٹنر شپ بنائی۔

پاکستان ویمن کی اوپننگ جوڑی نے آئرش بولرز کی ایک نہ چلنے دی اور پاکستان ویمن ٹیم مقررہ اوورز میں 3 وکٹوں کے نقصان پر335 رنز بنائے۔

گرین شرٹس کی جانب سے اوپنرز منیبہ علی اور سدرا امین نے پاکستان ویمن کرکٹ کا کسی بھی وکٹ کی پارٹنرشپ کا نیا ریکارڈ بھی قائم کر دیا، دونوں کے درمیان 221 رنز کی پارٹنر شپ قائم ہوئی۔

اس سے پہلے بسمہ معروف اور ندا ڈار نے 2013 میں ڈبلن میں آئر لینڈ کے خلاف چوتھی وکٹ کی شراکت میں 181 رنز بنائے تھے۔

منیبہ علی کیریئر کی پہلی سنچری بناتے ہوئے 114 گیندوں پر 107 رنز بنا کر آوٹ ہوئیں، سدرہ امین نے ریکارڈ ساز 176 رنز کی ناقابل شکست اننگز کھیل کر پاکستان کی جانب سے سب سے زیادہ اسکور اور 3 سنچریز بنانے والی پلیئر کا اعزاز بھی اپنے نا م کر لیا۔

 سدرہ امین سے پہلے جویریہ خان نے سری لنکا کے خلاف 133 رنز کا ریکارڈ بنایا تھا، سدرہ امین کی اننگز میں 20 چوکے اور 1 چھکا شامل تھا۔

عالیہ ریاض نے 29 اور صدف شمس 3 رنز بنا کر آؤٹ ہوئیں جبکہ فاطمہ ثنا 3 رنز بنا کر ناٹ آؤٹ رہیں، جواب میں آئرلینڈ ویمن 49 اعشاریہ 3 اوورز میں 207 رنز بنا کر آؤٹ ہو گئی۔

کپتان لاورا ڈیلینی نے 69 اور اورلا پرینڈرگسٹ نے 29 رنز کی اننگز کھیلی۔

فاطمہ ثنا اور نشرہ سندھو نے 2،2 وکٹیں حاصل کیں سدرا امین پلیئر آف دی میچ قرار پائیں، پاکستان اور آئرلینڈ کی ویمن ٹیموں کے درمیان اگلا میچ اتوار کو کھیلا جائے گا۔

بشکریہ جنگ