منگھوپیر میں کراچی واٹر اینڈ سیوریج بورڈ کے افسر کی ٹارگٹ کلنگ

کراچی غربی کے علاقے منگھوپیر میں موٹر سائیکل سوار ملزمان نے کراچی واٹر اینڈ سیوریج بورڈ (کے ڈبلیو ایس بی) کے ایک سب انجینئر کو فائرنگ کر کے قتل کردیا۔

منگوپیر تھانے کے ایس ایچ او حاجی ثناء اللّٰہ کے مطابق واردات منگھوپیر کی واٹر بورڈ کالونی میں ریزروائر کی پہاڑی سے اترتے ہوئے ہوئی۔

پولیس کے مطابق 42 سالہ محمد فرقان کراچی کو پانی سپلائی کرنے والی حب کینال پر بطور سب انجینئر تعینات تھا۔

مقتول معمول کے مطابق کھانا کھانے کے لیے ریزروائر کی پہاڑی پر قائم فلٹر پلانٹ میں گیا تھا اور موٹر سائیکل پر پہاڑی سے نیچے اتر رہا تھا کہ موٹر سائیکل سوار ملزمان نے اسے نشانہ بنایا۔

محمد فرقان کی لاش عباسی شہید اسپتال منتقل کی گئی۔

اسپتال ذرائع کے مطابق 42 سالہ فرقان کو سر میں نائن ایم ایم پستول کی گولیاں ماری گئیں۔

حاجی ثناء اللّٰہ کے مطابق جائے وقوعہ سے نائن ایم ایم پستول کے دو خالی خول بھی برآمد ہوئے۔

پولیس کی ابتدائی تفتیش کے مطابق فرقان کو مبینہ طور پر ٹارگٹ کلنگ کا نشانہ بنایا گیا۔

پولیس کے مطابق مقتول کی موٹر سائیکل غائب ہے اس سلسلے میں مزید تفتیش کی جارہی ہے۔

سینئر سپرنٹنڈنٹ پولیس (ایس ایس پی) کراچی ویسٹ فیصل بشیر میمن کے مطابق واردات ٹارگٹ کلنک ہے، پولیس نے جائے وقوعہ سے شواہد حاصل کرلیے ہیں۔

بشکریہ جنگ