ہیوسٹن: سعید شیخ کو خدمات پر اعلیٰ ایوارڈ

امریکی ریاست ٹیکساس کے شہر ہیوسٹن کے لیے گراں قدر خدمات پر ورلڈ افیئر کونسل کی جانب سے پاکستانی رہنما سعید شیخ کو گلوبل لیڈر آف انفلوئنس ایوارڈ 2022ء سے نواز دیا گیا۔

سعید شیخ اس طرح پہلے پاکستانی امریکی بن گئے جنہیں اس اعلیٰ ایوارڈ سے نوازا گیا ہے، انہیں یہ ایوارڈ کونسل کے 24 ویں سالانہ تقریب میں دیا گیا۔

سعید شیخ کا اس موقع پر کہنا تھا کہ اس ایوارڈ کا کریڈٹ جاوید انور سمیت متعدد کمیونٹی تنظیموں کو جاتا ہے جن کے تعاون اور سرپرستی کی وجہ سے خدمات کی انجام دہی ممکن ہوسکی۔

اس موقع پر رکنِ کانگریس شیلا جیکسن نے سعید شیخ کو امریکی کانگریس کی تعریفی سند بھی پیش کی۔

خاتون رکن کانگریس کا اس موقع پر کہنا تھا کہ اپنی خدمات کی وجہ سے سعید شیخ اس گراں قدر ایوارڈ کے مستحق تھے جو ناصرف پاکستانی کمیونٹی بلکہ ہیوسٹن کے لیے بھی باعثِ افتخار ہے۔

ہیوسٹن میں متعین پاکستانی قونصل جنرل ابرار ہاشمی کا کہنا تھا کہ میں سعید شیخ کی قابلِ تحسین خدمات کا شاہد ہوں جو انہوں نے نہ صرف پاکستانی کمیونٹی بلکہ متعدد کمیونٹیز کے لیے آفت کی گھڑی میں انجام دیں۔

ممتاز کاروباری شخصیت جاوید انور نے بھی ایوارڈ ملنے پر سعید شیخ کو مبارک باد دی۔

بشکریہ جنگ