عالمی درجہ حرارت میں اضافے کی حد نظرانداز کی جارہی ہے، اقوام متحدہ

اقوام متحدہ نے خبردار کیا ہے کہ عالمی درجہ حرارت میں اضافے کی حد کو نظرانداز کیا جارہا ہے۔

موسمیاتی تبدیلی پراقوام متحدہ کی نئی تجزیاتی رپورٹ میں کہا گیا ہے کہ عالمی درجہ حرارت میں اضافے کو 1.5 سینٹی گریڈ کی حد سے نیچے رکھنے کا کوئی قابل اعتبار راستہ موجود نہیں،موجودہ سرگرمیوں سے اس صدی میں دنیا تقریبا 2.8 سینٹی گریڈ تک گرم ہونے کا امکان ہے۔

نئی کوششوں سے 2030 تک کاربن کے عالمی اخراج میں 1 فیصد سے بھی کم کمی آئے گی ۔

رپورٹ میں کہا گیا ہے کہ گزشتہ سال کی عالمی موسمیاتی کانفرنس COP 26 کے بعد سے حکومتوں کے کاربن ڈائی آکسائیڈ میں کمی کے منصوبے بڑی حد تک ناکافی رہے ہیں۔

ماہرین کے مطابق1.5 سینٹی گریڈ کی حد سے آگے بڑھنے پرپوری دنیا پر خطرناک  اثرات مرتب ہوں گے اور1.5 سینٹی گریڈ کی حد کو برقرار رکھنے کے لیے  45 فیصد کی کمی کی ضرورت ہے

رواں ہفتے اقوام متحدہ کے سیکریٹری جنرل انتونیو گوتیرش نے کہا تھا کہ دنیا کو موسمیاتی تبدیلی پر دوبارہ توجہ دینے کی ضرورت ہے۔

اگلی عالمی موسمیاتی کانفرسCOP27 ایک ہفتے بعد مصر میں ہونی ہے۔

بشکریہ جنگ