بھارتی ویمن کرکٹرز کو مرد کھلاڑیوں کے برابر معاوضہ ملے گا

بھارتی کرکٹ بورڈ نے خواتین کھلاڑیوں کی معاوضہ مرد کھلاڑیوں کے برابر کرنے کا اعلان کر دیا۔

سینٹرل کنٹریکٹ میں شامل تمام مرد و خواتین بھارتی کرکٹرز کو ایک جیسا معاوضہ دیا جائے گا۔

بی سی سی آئی کے سیکرٹری جے شاہ نے ٹوئٹر پر اعلان کرتے ہوئے کہا کہ بی سی سی آئی امتیازی رویے کو قابو کرنے کے لیے پہلا قدم اٹھا رہا ہے۔

ان کا کہنا تھا کہ ہم کنٹریکٹ میں شامل خواتین کرکٹرز کے لیے مساوی ادائیگی پالیسی نافذ کر رہے ہیں۔

انہوں نے کہا کہ مرد و خواتین کرکٹرز کی مساوی میچ فیس سے بھارتی کرکٹ صنفی مساوات کے ایک نئے دور میں داخل ہو رہا ہے۔

اس اقدام کے بعد خواتین کرکٹرز کو فی کھلاڑی ٹیسٹ میچ کھیلنے کے 15 لاکھ، ون ڈے میچ کے 6 لاکھ اور ٹی 20 میچ کھیلنے کے 3 لاکھ روپے ملیں گے۔

بشکریہ جنگ