وزیراعظم شہباز شریف کا یوسف گیلانی کو ٹیلیفون، بیٹے کی کامیابی پر مبارکباد

وزیراعظم شہباز شریف نے سابق وزیراعظم یوسف رضا گیلانی کو ان کے صاحبزادے موسیٰ گیلانی کی کامیابی پر مبارک باد دی ہے۔

شہباز شریف نے یوسف رضا گیلانی سے ٹیلیفونک گفتگو کی، اس موقع پر موسیٰ گیلانی بھی موجود تھے۔

وزیراعظم شہباز شریف سے موسیٰ گیلانی نے بھی بات کی اور ان سے مبارک باد وصول کی۔

شہباز شریف نے دوران گفتگو کہا کہ ملتان کے عوام نے ایک بار پھر گیلانی خاندان پر اعتماد کا اظہار کیا ہے۔

انہوں نے مزید کہا کہ موسیٰ گیلانی کی جیت حکومتی اتحاد پاکستان ڈیموکریٹک موومنٹ (پی ڈی ایم) کی مشترکہ جیت ہے۔

اس دوران یوسف رضا گیلانی نے وزیراعظم شہباز شریف کا شکریہ ادا کیا۔

بشکریہ جنگ