ملتان، نشتراسپتال کی چھت کے کمرے میں مزید لاشوں کا انکشاف

ملتان میں واقع نشتر اسپتال کی چھت پر کمرے میں مزید لاوارث لاشوں کا انکشاف ہوا ہے۔

نشتر اسپتال کی چھت اور کمرے میں درجنوں لاشیں گل سڑ رہی ہیں جس پر وزیرِ اعلیٰ پنجاب پرویز الہٰی نے نوٹس لیتے ہوئے ذمے دار عملے کے خلاف سخت کارروائی کی ہدایت جاری کی ہے۔

وزیرِ اعلیٰ پنجاب پرویز الہٰی کی ہدایت پر سیکرٹری ہیلتھ ساؤتھ پنجاب نے تحقیقات کے لیے 6 رکنی کمیٹی اور جامعہ کے وائس چانسلر نے تین رکنی کمیٹی تشکیل دے دی ہے۔

دوسری جانب اس دلخراش واقعے پر سیکریٹری ہیلتھ ساؤتھ پنجاب کی جانب سے بنائی گئی 6 رکنی کمیٹی تین روز میں اپنی رپورٹ پیش کرے گی جبکہ 3 رکنی کمیٹی نشتر میڈیکل یونیورسٹی کے وائس چانسلر کو تمام معلومات کے ساتھ اپنی رپورٹ جَلد پیش کرے گی۔

واضح رہے کہ گزشتہ روز ملتان کے نشتر اسپتال کے ڈیڈ ہاؤس کی چھت پر لاوارث لاشیں پھینکنے کا دلخراش واقعہ پیش آیا تھا۔

بشکریہ جنگ