عمران خان کی 50 ہزار کے جرمانے کیخلاف اپیل پر فیصلہ محفوظ

الیکشن کمیشن آف پاکستان نے ضابطۂ اخلاق کی خلاف ورزی پر عمران خان کی ڈی ایم او کے 50 ہزار روپے کے جرمانے کے خلاف اپیل پر فیصلہ محفوظ کر لیا۔

دورانِ سماعت عمران خان کے وکیل نے الیکشن کمیشن کو بتایا کہ انتخابی ضابطۂ اخلاق کی کوئی خلاف ورزی نہیں کی، ریاستی وسائل استعمال نہیں کیے۔

انہوں نے کہا کہ ملک بھر میں جلسے کیے، کبھی سرکاری مشینری استعمال نہیں کی، سرکاری وسائل کے استعمال پر نوٹس پبلک آفس ہولڈر کو جاتا ہے۔

الیکشن کمیشن نے وزیر اعلیٰ محمود خان پر بھی 50 ہزار روپے جرمانہ عائد کردیا، اس کے ساتھ ساتھ مراد سعید، علی زیدی پر بھی50، 50 ہزار روپے جرمانہ کیا گیا۔

چیئرمین پی ٹی آئی کے وکیل نے دلائل دیتے ہوئے یہ بھی کہا کہ الیکشن لڑنے والے امیدوار کو نوٹس جاری نہیں کیا جاتا۔

الیکشن کمیشن آف پاکستان نے دلائل مکمل ہونے کے بعد عمران خان کی اپیل پر فیصلہ محفوظ کر لیا۔

بشکریہ جنگ