منچھر جھیل میں پانی کے دباؤ میں مستقل اضافہ

سکھر بیراج سے سیلابی ریلا رات گئے کوٹری بیراج پہنچ گیا، بیراج پر اونچے درجے کا سیلاب ہے، سندھ کے ضلع دادو کی منچھر جھیل میں پانی کا دباؤ مستقل بڑھ رہا ہے۔

محکمہ آب پاشی کے مطابق کوٹری بیراج پر اونچے درجے کا سیلاب ہے، بیراج کے تمام پشتے محفوظ ہیں اور عملہ الرٹ ہے سیلابی ریلا ساڑھے پانچ اور چھ لاکھ کیوسک کے درمیان ہوگا۔

سال 2010 میں کوٹری بیراج سے 9 لاکھ 64 ہزار کیوسک کا ریلا گزر چکا ہے، اس لیے خطرے کی کوئی بات نہیں ہے۔

دریائے سندھ میں کوٹری بیراج کے مقام سے 5 لاکھ کیوسک سے زائد کا سیلابی ریلا گزر رہا ہے۔

دوسری جانب سندھ کے ضلع دادو کی منچھر جھیل میں پانی کا دباؤ مستقل بڑھ رہا ہے، دباؤ کے نتیجے میں دانستر کے دروازوں کے اوپر سے پانی اوور فلو ہو کر دانستر نہر میں داخل ہو رہا ہے۔

دانستر نہر کے دروازوں پر پانی کے دباؤ کے باعث دروازے ٹوٹنے کا خدشہ بھی ظاہر کیا جارہا ہے۔

اس وقت منچھر جھیل میں پانی کی سطح 122 آر ایل سے زائد ہے، دانستر گیٹ کی لمبائی لوہے کی نصب شدہ چادر کے ساتھ 22 فٹ ہے، جھیل کے سطح 22 فٹ سے زائد ہونے کے باعث پانی گیٹ کے اوپر سے اوور فلو ہو رہا ہے۔

تھرپارکر کے9 دیہات آفت زدہ قرار  دیے گئے ہیں، گاؤں دریا خان چانڈیو کی قدرتی آبی گزر گاہ اکروڈارو میں طغیانی کے باعث مختلف دیہات زیر آب آچکے ہیں۔

دادو کی تحصیل خیرپور ناتھن شاہ کے مختلف دیہاتوں میں پانی داخل ہوگیا ہے جس کے بعد سیلاب متاثرین کسمپرسی کی حالت میں زندگی گزارنے پر مجبور ہیں۔

خیبر پختونخوا میں مونڈا ہیڈورکس سیلاب میں بہہ جانے کے باعث ضلع مہمند کے مکین دریائے سوات میں کشتیوں کا پُر خطر سفر کرنے پر مجبور ہیں۔

بشکریہ جنگ