حلیم عادل کی گرفتاری سے روکنے پر PTI رہنماؤں کیخلاف مقدمہ درج

سینٹرل جیل کراچی کے باہر سندھ اسمبلی میں اپوزیشن لیڈر حلیم عادل شیخ کی گرفتاری سے پولیس کو روکنے اور ہلڑ بازی پر ایسٹ زون پولیس نے پی ٹی آئی رہنماؤں اور کارکنان کے خلاف مقدمہ درج کر لیا۔

پولیس نے پی ٹی آئی کے ایم این اے فہیم خان، ایم پی اے شاہنواز جدون، راجہ اظہر 30 کارکنان کے خلاف مقدمہ درج کیا ہے۔

پولیس کے مطابق نیو ٹاؤن پولیس اسٹیشن میں درج مقدمے میں ہنگامہ آرائی، کارِ سرکار میں مداخلت سمیت دیگر دفعات شامل کی گئی ہیں۔

پولیس کا مزید کہنا ہے کہ مقدمے میں نامزد پی ٹی آئی رہنماؤں اور کارکنان نے گزشتہ روز سینٹرل جیل کراچی کے باہر ہلڑ بازی کی تھی۔

پولیس کا یہ بھی کہنا ہے کہ نامزد پی ٹی آئی رہنما و کارکنان نے پولیس کو حلیم عادل شیخ کی گرفتاری اور ہمراہ لے جانے سے روکا تھا۔

واضح رہے کہ گزشتہ روز کراچی کی سینٹرل جیل میں قائم انسدادِ دہشت گردی کی عدالت نے حلیم عادل شیخ کی ضمانت منظور کی تھی جبکہ جیل سے رہا ہوتے ہی پولیس نے انہیں دوسرے مقدمے میں گرفتار کر لیا تھا۔

سینٹرل جیل میں قائم انسدادِ دہشت گردی کی عدالت نے اینٹی انکروچمنٹ افسر کو دھمکانے کے کیس میں حلیم عادل شیخ کی ضمانت منظور کی تھی۔

عدالت نے 50 ہزار روپے کے مچلکوں کے عوض اپوزیشن لیڈر کو رہا کرنے کا حکم دیا تھا، جبکہ عدم پیشی پر حلیم عادل شیخ کی عبوری ضمانت مسترد کر دی تھی۔

حلیم عادل شیخ کے خلاف سرکاری افسر کو دھمکیاں دینے کا مقدمہ گلشنِ معمار تھانے میں درج ہے۔

جیل سے رہا ہوتے ہی پولیس نے حلیم عادل شیخ کو دوسرے مقدمے میں گرفتار کر لیا تھا۔

اس موقع پر پی ٹی آئی کے رکنِ صوبائی اسمبلی شاہنواز جدون، راجہ اظہر پولیس اسٹیشن میں موجود تھے جبکہ پولیس اسٹیشن کے باہر پی ٹی آئی کے کارکن جمع ہو گئے تھے۔

بشکریہ جنگ