ہوا کا کم دباؤ موجود، سندھ میں مزید بارش کا امکان

محکمۂ موسمیات کا کہنا ہے کہ ہوا کا کم دباؤ وسطی سندھ اور بھارتی راجھستان پر موجود ہے، کل رات تک کراچی سمیت سندھ کے بیشتر اضلاع میں گرج چمک کے ساتھ بارش کا امکان ہے۔

محکمۂ موسمیات کے مطابق سندھ میں تھر پارکر، عمر کوٹ، سانگھڑ، بدین، حیدر آباد، ٹھٹھہ، سجاول، مٹیاری، ٹنڈو محمد خان، جیکب آباد، سکھر، لاڑکانہ اور دیگر مقامات پر بارش کا امکان ہے۔

کراچی میں کل تک چند مقامات پر گرج چمک کے ساتھ جبکہ چند مقامات پردرمیانی سے موسلادھار بارش ہونے کا امکان ہے۔

رپورٹ کے مطابق 26 اگست تک بلوچستان کے شمال مشرقی اور جنوبی اضلاع میں وسیع پیمانے پر بارش ہو سکتی ہے۔

چیف میٹرولوجسٹ سردار سرفراز کا کہنا ہے کہ کراچی اور گرد و نواح میں بارش کا تیز اسپیل کل تک ختم ہوجائے گا۔

بلوچستان میں ہونےوالی بارشیں دادو، جامشورو، قمبر اور شہداد کوٹ میں سیلاب کا سبب بن سکتی ہیں، جبکہ موسلادھار بارشوں کے نتیجے میں پہلے سے زیرِ آب علاقوں میں صورتِ حال مزیدخراب ہو سکتی ہے۔

رپورٹ میں بتایا گیا ہے کہ خضدار، لسبیلہ، حب اور کیرتھر رینج میں ہونے والی مسلسل بارشیں حب ڈیم، تھڈو ڈیم اور ندی نالوں میں دباؤ پیدا کر سکتی ہیں۔

بشکریہ جنگ