موٹر وے پولیس کی ٹریکر سسٹم کے ذریعے بسوں کی نگرانی

آئی جی موٹر وے پولیس خالد محمود کا کہنا ہے کہ حفاظتی اقدامات کے پیشِ نظر جدید ٹریکر سسٹم کا قانون شروع کیا گیا ہے، جس کے ذریعے بسوں کی کڑی نگرانی کی جا رہی ہے۔

آئی جی موٹر وے پولیس خالد محمود کی خصوصی ہدایات پر مسافر بردار گاڑیوں کے حوالے سے اقدامات کرتے ہوئے مسافروں اور بس کے عملے کے لیے تربیتی پروگرام کا آغاز کیا گیا ہے۔

آئی جی موٹر وے پولیس کے ترجمان کے مطابق ناخوش گوار صورتِ حال پر قابو پانے کے لیے مسافروں اور بس کے عملے کی تربیت کا انعقاد کیا گیا ہے۔

آئی جی موٹروے پولیس خالد محمود کا کہنا ہے کہ حفاظتی اقدامات پر فیلڈ افسران ہر صورت عمل درآمد کو یقینی بنائیں۔

انہوں نے مزید کہا ہے کہ مسافر اور عملے کے ارکان موٹر وے پولیس کے ساتھ بھرپور تعاون کریں۔

آئی جی موٹروے پولیس خالد محمود کا یہ بھی کہنا ہے کہ کسی قسم کی کوتاہی ہر گز برداشت نہیں کی جائے گی۔

بشکریہ جنگ