ٹوئٹر صارفین نے شاہین شاہ آفریدی کا متبادل ڈھونڈ لیا

ٹوئٹر صارفین نے ایشیاء کپ اور انگلینڈ کے خلاف سیریز سے آؤٹ ہونے والے فاسٹ بولر شاہین شاہ آفریدی کا متبادل ڈھونڈ لیا۔

سماجی رابطے کی ویب سائٹ ٹوئٹر پر محمد عامر کا نام ٹرینڈ کر رہا ہے۔

فاسٹ بولر محمد عامر نے بھی ٹوئٹر پر سوال کیا ہے کہ میں ٹوئٹر پر ٹرینڈ کیوں کر رہا ہوں؟

ایک ٹوئٹر صار ف نے شاہین شاہ آفریدی کے متبادل کے طور محمد عامر کو بہترین انتخاب قرار دیا ہے۔

شہزاد نامی ایک صارف نے لکھا ہے کہ پاکستان کرکٹ بورڈ (پی سی بی) کو چاہیے کہ وہ محمد عامر کو ٹیم میں واپس بلائے، شاہین شاہ آفریدی کے بغیر ہمارا بولنگ اٹیک کمزور ہے، ان کے بعد ٹیم میں کوئی قابلِ بھروسہ بولر نہیں ہے۔

شاہین شاہ آفریدی کی انجری کے بعد وہاب ملک نامی ٹوئٹر صارف نے اپنے پیغام میں کہا ہے کہ اب صرف عامر ہی امید ہیں، براہ کرم انہیں واپس لے آؤ۔

واضح رہے کہ پاکستان کرکٹ بورڈ (پی سی بی) کی میڈیکل ایڈوائزری کمیٹی اور انڈی پینڈنٹ اسپیشلسٹس نے تازہ ترین اسکینز اور رپورٹس کی روشنی میں شاہین شاہ آفریدی کو 4 سے 6 ہفتے آرام کی تجویز دی ہے۔

فاسٹ بولر اے سی سی ٹی ٹوئنٹی ایشیاء کپ اور انگلینڈ کے خلاف ہوم سیریز سے باہر ہو گئے ہیں، ان کی ممکنہ طور پر نیوزی لینڈ میں اکتوبر میں ہونے والی سہ فریقی ٹی ٹوئنٹی سیریز کے لیے کرکٹ میں واپسی ہو گی۔

یاد رہے کہ 2020ء میں محمد عامر نے مینجمنٹ سے مایوس ہو کر ریٹائرمنٹ کا اعلان کر دیا تھا۔

فاسٹ بولر محمد عامر پاکستان کرکٹ ٹیم کی مینجمنٹ پر برس پڑے تھے اور کہا تھا کہ مجھے ذہنی طور پر ٹارچر کیا جا رہا ہے۔

دوسری جانب پی سی بی نے عامر کے ریٹائرمنٹ کے فیصلے کو ذاتی فیصلہ قرار دیتے ہوئے کہا تھا کہ آئندہ کسی بھی انٹرنیشنل میچ کے لیے ان کے نام پر غور نہیں کیا جائے گا۔

بشکریہ جنگ