ایک ماہ میں کام نظر آئے گا، وعدے پورے کریں گے، پرویز الہٰی

وزیراعلیٰ پنجاب چوہدری پرویز الہٰی نے کہا ہے کہ ہر شعبے میں ایک ماہ کے اندر کام نظر آنا شروع ہو جائیں گے، سارے وعدے پورے کریں گے۔

گجرات کے تاجروں، صنعتکاروں اور معززین سے ملاقات میں وزیراعلیٰ پنجاب نے کہا کہ ہماری حکومت نے آتے ہی تاجروں کے لیے کاروبار میں آسانیاں پیدا کی ہیں۔

انہوں نے کہا کہ صوبے بھر میں کارروبار کے اوقات کار کی پابندی کو ختم کیا، کارروباری مراکز اور مارکیٹیں پورے ہفتے کھولنے کی اجازت دی۔

چوہدری پرویز الہٰی نے مزید کہا کہ تاجروں اور صنعتکاروں کے لیے صوبے میں مزید سہولتیں فراہم کریں گے اور پنجاب میں اسٹیٹ آف آرٹ اسپیشل اکنامک زونز بنائے جائیں گے۔

اُن کا کہنا تھا کہ عوام کے دیرینہ مطالبے پر گجرات کو باقاعدہ ڈویژن کا درجہ دیا، کنجاہ اور جلالپور جٹاں کو تحصیل بنائیں گے۔

وزیراعلیٰ پنجاب نے یہ بھی کہا کہ گجرات میں انڈسٹریل اسٹیٹ کے قیام پر کام تیزی سے جاری ہے، صاف پانی کی فراہمی اور سیوریج کا بہترین نظام لائیں گے اور یہاں ویسٹ مینجمنٹ کمپنی بنائیں گے۔

انہوں نے کہا کہ ہم عمران خان کے ساتھ کھڑے ہیں، 2 ستمبر کو گجرات اسٹیڈیم میں عمران خان کا جلسہ ہوگا۔

چوہدری پرویز الہٰی نے کہا کہ ہر شعبے میں ایک ماہ کے اندر کام نظر آنے شروع ہو جائیں گے، سارے وعدے پورے کریں گے، تاجر برادری اور صنعتکاروں کے ساتھ ملاقاتوں کا سلسلہ تسلسل کے ساتھ جاری رہے گا۔

بشکریہ جنگ