کراچی: ملیر ندی میں بہنے والی گاڑی مل گئی، سوار 7 افراد کا پتہ نہیں

کراچی میں ایم نائن لنک روڈ پر ملیر ندی کے سیلابی پانی میں بہنے والی گاڑی ندی سے مل گئی، تاہم گاڑی میں سوار 7 افراد کا فی الحال پتہ نہیں چل سکا۔

لواحقین کے مطابق گاڑی میں ڈرائیور اور 4 بچوں سمیت 7 افراد سوار تھے۔

گزشتہ رات ہونے والی بارش کے بعد ایم نائن لنک روڈ پر ملیر ندی کا سیلابی پانی آ گیا تھا۔

سیلابی پانی کو پار کرنے کے دوران گاڑی سیلابی ریلے میں بہہ کر ندی میں جا گری تھی۔

کراچی میں مزید بارشوں کی پیشگوئی کے پیش نظر سندھ حکومت نے آج تمام تعلیمی اداروں میں چھٹی کا اعلان کیا ہے۔

ریسکیو ذرائع کے مطابق رات گئے گرنے والی گاڑی کی تلاش کا کام شروع کیا گیا تاہم اندھیرا ہونے کے باعث گاڑی کی تلاش کا کام روک دیا گیا تھا۔

آج صبح روشنی ہونے کے بعد ایدھی رضا کاروں نے گاڑی کی تلاش کا کام پھر شروع کیا تو لنک روڈ سے 2 سے 3 کلومیٹر دور گاڑی ندی سے مل گئی۔

ریسکیو ذرائع کے مطابق گاڑی میں کوئی لاش موجود نہیں تاہم گاڑی میں سوار افراد کی تلاش کا کام جاری ہے۔

ایدھی ذرائع کے مطابق گاڑی میں سوار خاندان کا تعلق حیدر آباد سے ہے۔

گاڑی میں ڈرائیور کی علاوہ میاں بیوی اور ان کے 4 بچے سوار تھے، متاثرہ خاندان کے افراد کراچی سے حیدر آباد جا رہے تھے۔

لنک روڈ پر حادثے کا شکار ہونے والی مذکورہ کار کے ڈرائیور کے بھائی حافظ عبدالحئی نے ’جیو نیوز‘ سے گفتگو میں بتایا کہ میرا بھائی حیدر آباد آ رہا تھا کہ ایک فیملی نے کہا کہ ہمیں بھی لے جائیں۔

عبدالحئی نے یہ بھی بتایا کہ قائد آباد سے میاں بیوی اور ان کے 4 بچوں کو لے کر بھائی حیدر آباد آ رہا تھا، تاہم شام 6 بجے کے بعد بھائی سے دوبارہ رابطہ نہیں ہوا۔

دوسری جانب ملیر ندی میں پانی کی سطح کم ہونے کے بعد ایم نائن لنک روڈ پر ٹریفک بحال کر دیا گیا ہے۔

سپر ہائی وے سے نیشنل ہائی وے تک ہیوی ٹریفک کی آمد و رفت بحال ہو گئی ہے۔

کئی گھنٹے سڑک بند ہونے کے باعث لنک روڈ پر ٹریفک کا دباؤ ہے۔

بشکریہ جنگ