بھارت میں 70 برس سے زیادہ عمر کے جوڑے کے ہاں بیٹے کی ولادت

بھارتی ریاست راجستھان میں 70 برس سے زیادہ عمر کے جوڑے کے ہاں ان کی شادی کے 54 برس بعد پہلی اولاد کی پیدائش ہوئی ہے۔ حال ہی میں ان کے  ہاں بیٹے کی ولادت کے بعد یہ معمر ترین  والدین بننے کا اعزاز حاصل کرنے والا جوڑا بن گیا۔

بتایا جاتا ہے کہ 75 سالہ گوپی چند اور ان کی 70 سالہ اہلیہ چندراوتی طویل عرصے سے اولاد کی نعمت سے محروم تھے۔

کئی سالوں سے کہ یہ جوڑا لاتعداد اسپتالوں اور کلینکس کے چکر کاٹ رہا تھا اور مختلف علاج اور پروسیجر سے بھی گزرے۔

تاہم ڈیڑھ برس قبل گوپی چند نے الور میں واقع ایک وٹرو فرٹیلیٹی کلینک سے رابطہ کیا تاکہ اس کی اہلیہ کی امید بر آئے، البتہ خاتون کی زیادہ عمر کی وجہ سے ڈاکٹرز کو تشویش تھی۔

گزشتہ برس ریاست گجرات کے ایک دیہی علاقے کی 70 برس کی خاتون جیووبن ولابائی رابڑی کے ہاں کامیابی کے ساتھ صحت مند بچے کی ولادت ہوئی تھی اور یہ خبر اخبارات کی شہ سرخی بنی تھی۔ 

اس کامیابی کو دیکھتے ہوئے چندراوتی کے معاملے پر بھی تجربہ کیا گیا پہلی دو کوششیں تو ناکام ہوئیں، لیکن تیسری کوشش کامیاب ہوئی اور چندراوتی کے ہاں حال ہی میں ایک صحت مند بیٹے کی ولادت ہوئی ہے۔

بشکریہ جنگ