لبنانی شہری نے منجمد اکاؤنٹ سے رقم نکلوانے کیلئے بینک عملے کو یرغمال بنالیا

لبنان میں ایک مسلح شہری نے بیروت کے ایک بینک میں داخل ہوکر اسٹاف کو یرغمال بنالیا اور دھمکی دی کہ اگر بینک نے فارن کرنسی اکاؤنٹ میں موجود اس کی جمع پونجی اسے نہ دی تو وہ خود سوزی کرلے گا۔ 

واضح رہے کہ سخت مالی اور اقتصادی بحران کی شکار لبنانی حکومت نے 2019 میں اقتصادی بحران کے باعث غیرملکی کرنسی اکاؤنٹس منجمد کر دیے تھے، جس کی وجہ سے مذکورہ شخص اور اس کے بھائی کے 7 لاکھ 10 ہزار امریکی ڈالر ضبط کرلیے گئے اور اب وہ اپنی غیرملکی کرنسی کو نکلوانے کا تقاضہ کر رہا ہے۔ 

عرب میڈیا نے سیکیورٹی حکام کے حوالے سے بتایا کہ شارٹ گن سے مسلح اس شخص نے بینک کے 6 سے 7 ملازمین کو یرغمال بنا لیا۔

عرب میڈیا کے مطابق سیکیورٹی فورسز نے بینک کو گھیرے میں لے لیا اور مسلح شخص سے مذاکرات کیے۔

مسلح شخص نے بینک عملے و دیگر افراد کی جانوں کی سلامتی کو ڈالرز کی شکل میں موجود اپنی رقم کی واپسی سےمشروط کردیا۔

بشکریہ جنگ