عمران خان سے فارن فنڈنگ کا سوال بار بار کریں گے، محمد زبیر

مسلم لیگ ن کے رہنما محمد زبیر کا کہنا ہے کہ سابق وزیر اعظم عمران خان سے فارن فنڈنگ کا سوال کریں گے اور بار بار کریں گے۔

اسلام آباد میں پریس کانفرنس کرتے ہوئے محمد زبیر نے کہا کہ عمران خان اپنے اثاثوں اور اپنے صادق اور امین ہونے کا ثبوت دیں۔

سابق گورنر سندھ کا کہنا ہے کہ برطانوی اخبار بتا رہا ہے کہ کس طرح سے چیریٹی کا پیسہ پی ٹی آئی کے اکاؤنٹ میں آیا، 8 سال سے فارن فنڈنگ کیس الیکشن کمیشن میں پڑا ہے۔

انہوں نے کہا کہ فارن فنڈنگ کیس پی ٹی آئی کے اپنے بانی رکن نے عمران خان کے خلاف فائل کیا، اکبر ایس بابر نے رقم منتقلی کے تمام شواہد پیش کیے، پی ٹی آئی یہ فیصلہ رکوانے کے لیے مختلف حیلے بہانے کر رہی ہے۔

رانا ثناء اللّٰہ نے کہا کہ 350 کے قریب لوگوں نے عمران خان کو غیر ملکی ممنوعہ فنڈنگ کی ہے، ان کے چار ملازمین کے ناقابل تردید شواہد ہیں جن کے اکاؤنٹس میں تقریبا 750 ملین ڈالر آئے۔

محمد زبیر کا کہنا ہے کہ اگر یہ بات غلط ہے تو پی ٹی آئی لندن کی عدالت میں مقدمہ کرے۔

مسلم لیگ ن کے رہنما نے کہا کہ نواز شریف پر جھوٹے مقدمات بنائے گئے، انہوں نے اپنے اثاثوں کا پورا حساب دیا، مسلم لیگ ن کے خلاف جھوٹے کیس بنائے گئے، ن لیگ کے تمام ارکان عدالتوں میں پیش ہوئے، ہم نے نیب کیسز اور جیلیں بھگتی ہیں۔

ان کا یہ بھی کہنا ہے کہ ہماری پارٹی اور تمام اراکین نے اثاثوں کے جوابات دیے۔

بشکریہ جنگ