یوکرینی صدر فیشن میگزین کیلئے فوٹو شوٹ کروانے پر تنقید کا شکار

یوکرینی صدر ولادیمیر زیلنسکی ملک میں موجودہ جنگی صورتِ حال کے دوران ایک فیشن میگزین کے لیے فوٹو شوٹ کروانے پر تنقید کا شکار ہو گئے۔

ولادیمیر زیلنسکی نے اپنی اہلیہ، یوکرین کی خاتونِ اوّل  اولینا زیلنسکا کے ساتھ مذکورہ میگزین کے لیے ایک رومانوی فوٹو شوٹ کروایا ہے، جو سوشل میڈیا پر وائرل ہو گیا ہے۔

ایسی صورتِ حال میں جب یوکرین میں روسی مداخلت کی وجہ سے ہزاروں لوگ ہلاک ہو رہے ہیں تو سوشل میڈیا صارفین کی جانب سے یوکرینی صدر پر میگزین کے لیے فوٹو شوٹ کروانے پر شدید تنقید کی جا رہی ہے۔

یہ فوٹو شوٹ یوکرین کی خاتونِ اوّل اولینا زیلنسکا کے غیر اعلانیہ، غیر سرکاری دورۂ امریکا کے تناظر میں کروایا گیا ہے، جس میں یہ انکشاف کیا گیا کہ اولینا زیلنسکا نے امریکا میں کانگریس سے خطاب کیا۔

اُنہوں نے اس خطاب میں کہا کہ وہ خاتونِ اوّل نہیں بلکہ ایک ماں اور بیٹی کی حیثیت سے امریکی کانگریس سے بات کر رہی ہوں۔

اُنہوں نے امریکی قانون سازوں کو یوکرین کے بچوں کی تصاویر دکھائیں جو روسی راکٹوں سے مارے گئے تھے اور امریکا سے یوکرین کی اسلحے کی صورت میں مزید مدد کی درخواست کی۔

اُدھر سوشل میڈیا صارفین کو کسی صورت بھی جنگ کے دوران یہ فوٹو شوٹ پسند نہیں آیا۔

یہاں ایک نظر صارفین کی جانب سے کیے گئے ٹوئٹس پر ڈال لیتے ہیں۔

بشکریہ جنگ