انگلینڈ کرکٹ ٹیم کے دورے سے متعلق محکمہ داخلہ پنجاب میں اجلاس

انگلینڈ کرکٹ ٹیم کے دورہ پاکستان سے متعلق محکمہ داخلہ پنجاب میں اجلاس ہوا، جس میں ڈی آئی جی آپریشنز لاہور سہیل چوہدری نے سیکیورٹی انتظامات پر بریفنگ دی۔

بریفنگ کے دوران انہوں نے بتایا کہ سیکیورٹی نافذ کرنے والے ادارے ہر طرح سے الرٹ رہیں گے، ریسکیو ٹیموں کے علاوہ اسپتال انتظامیہ بھی الرٹ رہے گی۔

ڈی آئی جی آپریشنز کا کہنا تھا کہ کرکٹ میچ کے دوران 3 سے 4 کنٹرول روم قائم کیے جائیں گے۔

ان کا کہنا تھا کہ انگلینڈ سے آنے والے وفد نے سیکیورٹی انتظامات پر اطمینان کا اظہار کیا۔

انہوں نے بتایا کہ وفد کا کہنا تھا کہ سابقہ کرکٹ میچ کے لیے کیے گئے سیکیورٹی انتظامات بہت عمدہ تھے۔ 

ڈئی آئی جی آپریشنز نے بریفنگ کے دوران بتایا کہ ہیلی کاپٹر کے ذریعے سیکیورٹی انتظامات کی سخت نگرانی کی جائے گی، ہر ٹکٹ لینے والے کا شناختی کارڈ اسکین کیا جائے گا۔

بشکریہ جنگ